Messadi Tier tractanda 2 Damonda da credit per il project Campadi Ogna Preziadas cusseglieras Preziai cussegliers 1. Historia Igl onn 2011 ha il plan pil svilup da Trun intimau da construir in niev baghetg pil campadi existent. Leutier ha ina studia preliminara dalla HTW Cuera attestau ch il project seigi da principi realisabels finanzialmein. Sin quella basa ha la vischnaunca da Trun, Trun Turissem e Trun egl avegnir priu en mira l engrondida e modernisaziun dil campadi Ogna. Ina gruppa da lavur communabla ha organisau igl onn 2012 ina concurrenza da project pil niev baghetg dil Campadi Ogna. Il project victur dils architects Iso Huonder e Lorenz Eugster da Cuera, elegius dalla giuria, ha saviu vegnir presentaus il fevrer 2013 alla publicitad. Planisai ein in niev baghetg da menaschi ed in per installaziuns sanitaras. Ina visualisaizun dil project da construcziun secatta ell aschunta A. Sper il project da construcziun ha la gruppa da lavur cun accumpignament extern da C. Derungs ed U. Fetz, omisdus dalla HTW Cuera, sviluppau duront l emprema mesadad digl onn 2013 ina fuorma d organisaziun adattada (incl. sboz per ils statuts, mira aschunta B). Leutier ha ella elaborau ina proposta da finanziaziun ed in plan da business. Per schazegiar la valeta dils baghetgs dil campadi existent ei E. Mark, expert da schazetg SEK/SVIT, vegnius consultaus. Il project previu ei vegnius presentaus ils 14 d uost 2013 als commembers da Trun Turissem. Lezs han approbau il project cun la resalva d ina decisiun positiva dalla vischnaunca politica. 2. Punct da partenza e stan dil project Project Tuturna Il project Tuturna ha perschuadiu la giuria tras l analisa fundada e la veglia e premura da sefatschentar da maniera seriusa cun la cuntrada e las structuras avon maun, sco era la sensibilitad en la realisaziun (mira aschunta A). Il niev baghetg principal cun restaurant e retscheviment sil Prau America cun sia ferma siluetta attira l attenziun e fuorma il center. Quel duei possibilitar in menaschi sur onn e daventar il liug da sentupada per hosps dil campadi ed indigens. Ina colligiaziun cun la Loipa Cadi e cun la via naziunala da velos ei da prender en mira. La casa dils cundrezs sanitars cun sia hoftypologia, in baghetg ch ensiara empau spazi dil contuorn selvadi e scaffescha egl interiur ina admosfera retratga e protegida. Quella casa ei construida da maniera sempla e vegn serrada duront igl unviern.
Igl englar dil Prau America dat sper il baghetg principal plaz per rulottas, bungalows sco era pil grond plaz da tendas. En la prolungaziun dalla terrassa dil restaurant ei previu ina plazza da giug per affons. Aua duei daventar in element impurtont da quei plaz. Il project Tuturna corrispunda el stadi momentan (concurrenza d architectura) ad in project preliminar. En la fasa da project che suonda en cass d ina decisiun positiva dallas instanzas politicas vegn il patrun representaus entras ina cumissiun da baghegiar. Quella vegn, ensemen cul team da planisaziun, a sviluppar il project ed empalar el viers la realisaziun. Organisaziun e structura Il project avon maun preveda in atgna societad acziunara per la finanziaziun dall infrastructura. La vischnauca da Trun mantegn la maioritad dallas aczias e Trun Turissem separticipescha sco acziunari minoritar. Ulteriurs investurs san vegnir integrai en la nova societad d aczias sco purtadra dil campadi da maniera sempla tras ina cumpra d aczias. Leutier duei ina societad da menaschi externa, resp. in affittader surprender il menaschi dil campadi (mira grafica 1). Quei vul dir: La vischnaunca da Trun sustegn il project da maniera finanziala, surlai denton il menaschi dil campadi all economia privata. Persuenter plaida surtut era la responsabladad limitada pil capital d aczias. Grafica 1: Organisaziun e moviments da finanzas Acziunaris (Possessurs) Credit da banca Vischnaunca da Trun Trun Turissem Infrastructura Emprest NRP Cantun / Confederaziun) Apport en bar ed en naturalias Campadi Trun SA Emprest Apport en naturalias Menaschi (extern) Tscheins d affittaziun Societad da menaschi / Persuna privata Ils acturs participai disponan dils suandonts tratgs caracteristics (mira sboz dils statuts ell aschunta B) Campadi Trun SA (da fundar da niev): La societad acziunara daventa possessura dil campadi e sepresenta sco fittadra. Siu pensum ei la finanziaziun dall infrastructura. La vischnaunca da Trun resta acziunaria maioritara e dispona da silmeins treis dils tschun commembers dil cussegl d administraziun. Trun Turissem dispona silmeins dad in commember dil cussegl d aministraziun.
La vischnaunca da Trun e Trun Turissem: Per la fundaziun dalla Campadi Trun SA contribuescha la vischnaunca da Trun in apport en bar ed en naturalias (incl. parcella en dretg da baghegiar pils stabiliments novs). Trun Turissem separticipescha en emprema lingia cul dretg da baghegiar (incl. baghetgs existents dil campadi) sco valurs naturalas. Societad da menaschi / affittader: Sco indemnisaziun pil diever dall infrastructura dil campadi paga la societad da menaschi, resp. igl affittader in tscheins d affittaziun. Finanziaziun Ils cuosts da construcziun per la transformaziun e renovaziun dil campadi Ogna muntan à 3.6 milliuns francs svizzers (plafonament dils cuosts). Quels vegnan curclai tras las suandontas contribuziuns da finanziaziun (en frs.): Emprest NRP (Cantun Grischun / Confederaziun) 1 : 810 000 Contribuziun à fonds perdu dil cantun Grischun: 135 000 Emprest dalla Vischnaunca da Trun: 2 090 000 Capital d aczias dalla Vischnaunca da Trun: 565 000 Ulteriurs investurs: 0 (Agid da muntogna, firmas da construziun participadas) Il consentiment provisoric dil cantun / confederaziun ei avon maun en fuorma d ina decisiun preliminara. Il consentiment definitiv succeda pér cun la decisiun positiva dil pievel. Leutier marschan contractivas cugl Agid da muntogna per in sustegn finanzial. Era cheu succeda in consentiment definitiv pér suenter la decisiun dil pievel. Ina presentaziun commentada dalla bilanza dalla Campadi SA anfl ins ell aschunta C. Plan da business Il plan da business duei eruir, schebein il menaschi dil campadi seigi finanzialmein supportabels per in affittader. Las calculaziuns sebasan sin las suandontas supposiziuns (mira grafica 2) Pernottaziuns: Il schazetg s orientescha a vesta mesauna sigl intragliuater dallas pernottaziuns per campadi el cantun Grischun (mira aschunta D) 2. Sviulta: Ils prezis per pernottaziun schain el sectur bass dils campadis grischuns consultai (mira Masterplan Trun 2015). Expensas da menaschi: cumpeglian cuosts materials directs, cuosts da persunal (fixai ault), cuosts da manteniment, energia, ulteriurs cuosts da menaschi, reclama, cuosts per segiradas. Gudogn da menaschi (EBITDA): Sviluta cuosts da menaschi Tscheins d affittaziun: seresulta dils cuosts da finanziaziun dalla Vischnaunca da Trun (amortisaziun digl emprest, tscheins pils credits da banca). Ils onns da menaschi 1-10 cuviera igl affittader cul tscheins d affittaziun igl emprest NRP (frs. 81 000 per onn). 1 La Vischnaunca da Trun sto dar cauziun per maximal quella summa (10 onns). 2 3 900 pernottaziuns igl emprem onn da menaschi, silsuenter in carschament da 7% per onn.
Leutier surpren el duront ils onns da menaschi 4 tochen 25 ina part dall amortisaziun digl emprest dalla vischnaunca 3, sco era duront ils onns da menaschi 1 tochen 20 ils cuosts dils tscheins per igl emprest dalla vischnaunca. (Supposiziun: La vischnaunca da Trun pren si in emprest da banca cun ina tschensida dad 1,5 %) La grafica 2 muossa la supportabladad finanziala pigl affittader tenor il plan dil quen. Grafica 2: Plan dil quen Resultat: Cun las supposiziuns fixadas sa igl affittader quintar cun in gudogn naven digl emprem onn da menaschi. Il gudogn net ei naven dil 3. onn da menaschi positivs 3. Damonda da credit Per la realisaziun dil project Campadi Ogna ei il sustegn finanzial dalla vischnaunca da Trun necessaris. Trun Turissem persuls vegn buc ad esser el cass da saver finanziar la transformaziun planisada dil campadi. Il project proponiu cun 4 500 tochen 5 000 pernottaziuns per onn a vesta mesauna lai spitgar impuls economics remarcabels a Trun. Perquei selai ina participaziun finanziala considerabla dalla vischnaunca da Trun giustificar. 3 Il 4. onn 5 % dall amortisaziun scadenta, il 5avel onn 10%, il 6avel onn 15%, tochen tier il 10avel onn 35%, naven digl 11avel onn 100% dall amortisaziun, perquei ch igl emprest NRP ei lu pagaus giu. Cheutras munta la summa per l amortisaziun dil credit da banca a frs. 6 000 (il 4. onn) tochen frs. 40 000 (il 10avel onn), silsuenter frs. 115 000 per onn.
Leutier duei la vischnaunca da Trun contribuir en tut cun frs. 2 655 000 alla finanziaziun, da quei frs. 2 090 000 sco emprest tschensibel alla Campadi Trun SA e leutier vegn ella a signar aczias ella valeta da frs. 565 000. Consequenzas finanzialas La grevezia finanziala per la vischnaunca da Trun seresulta tenor las modalitads da finaziaziun proponidas tenor la grafica 3. Leutier ei da remarcar il suandont. L amortisaziun (inclusiv tscheins) dil credit da banca pil capital d aczias dalla vischnaunca (frs. 565 000) surpren la vischnaunca sezza. Amortisaziun e pagament dils tscheins: (frs. 36 000 igl 1. onn, silsuenter sesminuend [lingias en strehs]). L amortisaziun dil credit da banca pigl emprest alla Campadi Trun SA surpren la vischnaunca da Trun ils emprems 4 onns cumpleinamein. Naven dil 4. entochen il 10avel onn da menaschi surpren igl affittader via tscheins d affittaziun ina part dall amortisaziun 3. Silsuenter surpren igl affittader cumpleinamein l amortisaziun ed il pagament dils tscheins [lingia blaua]. Cuosts da finanziaziun (total: amortisaziun e pagament dils tscheins) ein indicai tras la lingia verda (= Summa dallas treis autras lingias resp. part dils cuosts). Grafica 3: Consequenzas finanzialas per la vischnaunca onns da menaschi Resultat: La grevezia finanziala per la vischnaunca ei all entschatta cun frs. 148 000 en cumparegliaziun aulta, cunquei che l amortisaziun digl emprest tras igl affittader vegn suspendida, resp. messa a quen mo per part duront ils onns da menaschi 1 tochen 10. Naven digl 11avel onn da menaschi munta la contribuziun finanziala dalla vischnaunca aunc à frs. 32 000. Cunquei munta la grevezia intragliauter à frs. 80 000 per onn (sur 25 onns). Ord vesta dalla suprsatonza communala ei la grevezia finanziala supportabla per la vischnaunca. Era sch il project ei cumpigliaus cun rescs (denter auter il svilup incert dil diember da hosps), ei la suprastonza communala perschuadida dallas schanzas economicas da quei project.
4. Proposta Preziadas cusseglieras Preziai cussegliers Il project Campadi Ogna avon maun lai spitgar considerabels impuls pil svilup economic da Trun. Cun la finanziaziun da partenza tras la vischnaunca da Trun sesviluppescha in niev campadi attractiv sco magnet turistic e cumpletaziun dallas purschidas existentas el contuorn dil territori Ogna/America. Cheutras sa ina valur supplementara turistica vegnir messa en moviment el vitg, dad ina vart directamein tras ulteriuras pernottaziuns, da l autra vart tras dapli consumaziun el vitg (restaurants, stizuns, etc.). La fundaziun dalla Campadi Trun SA sco societad d infrastructura independenta lubescha da reunir differents partenaris da finanziaziun e cheutras da segirar ina finanziaziun optimala. La surdada dil menaschi dil campadi ad in partenari extern dat ad in affittader il necessari spazi d agir el menaschi. Il medem mument ei la pusseivladad d influenza tras la vischnaunca garantida sil livel strategic sur il cussegl d aministraziun. Damonda da credit La suprastonza communala propona al cussegl da vischnaunca d approbar per mauns dalla votaziun all urna suandontas propostas: 1.Principi Participaziun maioritara dalla vischnaunca da Trun alla Campadi Trun SA tenor il sboz dils statuts aschuntau e conceder il credit correspondent da frs. 2 655 000. 2.Valur en naturalias Surdar la parcella en dretg da baghegiar (surfatscha necessaria pil baghetg d economia sin l actuala parcella 1662) per la valeta da frs. 50 000 alla Campadi Trun SA encunter la surdada da 50 aczias al num, deliberadas cumpleinamein a nominalmein frs. 1 000. 3.Emprest Approbaziun dalla concessiun d in emprest dalla vischnaunca alla Campadi Trun SA ell altezia da frs. 2 090 000. 4. Cauziun Prestaziun d ina cauziun en favur da cantun e confederaziun ell altezia maximala da frs. 810'000 per 10 onns. Suprastonza communala Trun Il president Donat Nay La vicecanzlista Sandra Gautschi 7166 Trun, 30-08-2013