UNIUN DA SCURSALETS TRUN INVITAZIUN ALLA RADUNONZA GENERALA

UNIUN DA SCURSALETS TRUN INVITAZIUN ALLA RADUNONZA GENERALA Sonda, ils 22 d avrel 2017 allas 19 :30 uras ella Ustria Ischi, Trun Tractandas 01. Beinvegni ed appel 02. Approbaziun dalla gliesta da tractandas 03. Elecziun da dus dumbravuschs 04. Approbaziun dil protocol dalla radunonza generala dils 16 d avrel 2016 05. Approbaziun dils rapports annuals 06. Rendaziun dil quen, rapport dils revisurs ed approbaziun 07. Elecziuns a. pesident b. cassier c. in revisur quen 08. Mutaziuns a. entradas b. extradas 09. Orientaziun project da sanaziun plazza da glatsch 10. Sesiun 2017/2018 Informaziuns dils trenaders/responsabels a. scola da patinar (Silvio Albin) b. juniors e scolars (Raffael Bearth) c. activs (Clau Giger) d. seniors (Pascal Albin) Occurrenzas a. camp da trenament ad Arosa, 25/26-11-2017 b. turnier da s. Stiafen, 26-12-2017 (datum d untgida: 06-01-2018) c. turnier da fierer rudialas, 20-01-2018 (datum d untgida: 27-01-2018) d. di da skis, 03-03-2018 e. autras occurenzas 11. Fixaziun contribuziuns annualas 12. Varia e tscheina Trun, ils 3 d avrel 2017 Cordialmein envida la suprastonza UDS Trun

Protocol dalla radunonza generala dall Uniun da scursalets Trun Sonda, ils 16 d avrel 2016 el Cafè Tschut a Trun Tractandas 1. Beinvegni ed appel 2. Approbaziun dalla gliesta da tractandas 3. Elecziun da dus dumbravuschs 4. Approbaziun dil protocol dalla radunonza generala dils 25 d avrel 2015 5. Approbaziun dils rapports annuals 6. Rendaziun dil quen, rapport dils revisurs ed approbaziun 7. Elecziuns a. actuar b. in revisur da quen 8. Mutaziuns a. entradas b. extradas 9. Orientaziun project da sanaziun a. plazza da glatsch b. Zamboni 10. Conclus e credit a. plazza da glatsch b. Zamboni 11. Sesiun 2016/2017 Informaziuns dils trenaders/responsabels a. scola da patinar (Silvio Albin) b. juniors e sciolars (Raffael Bearth) c. activs (Clau Giger) d. seniors (Pascal Albin) Occurrenzas a. camp da trenament ad Arosa, 26/27-11-2016 b. turnier da s. Stiafen, 26-12-2016 (datum d untgida: 07-01-2017) c. turnier da fierer rudialas, 28-01-2017 (datum d untgida: 04-02-2017) d. di da skis, 04-03-2017 e. autras occurenzas 12. Fixaziun contribuziuns annualas 13. Varia e tscheina

01. Beinvegni ed appel President Raffael Bearth arva la radunonza e fa in cordial beinvegni a tuts presents. In special beinvegni fa el als commembers d honur Silvio Albin, Renato Della Valle ed Giachen Riedi sco era allas persunas ch ein l emprema gada alla radunonza generala dall UdsT. Sco appel vegn schau cursar ina gliesta che demuossa ina preschientscha da 25 commembers. Schau perstgisar han Kevin Albin, Moreno Bundi, Markus Caduff, Marcellino Flury, Nino Liesch, Martin Lutz, Livio Pally, Manuel Reichenbach, Christoph Senn, Curdin Tuor, Fabrizio Tuor, Philippe Vincenz, Roy Vincenz, Ervin Wolf e Riccardo Wolf. 02. Approbaziun dalla gliesta da tractandas La suprastonza fa la proposta da strihar las tractandas 9.a) Orientaziun project da sanaziun plazza da glatsch, e 10.a) Conclus e Credit plazza da glatsch. La suprastonza ha retschiert las offertas che eran da basegn per quei project memia tard. Aschia che la suprastonza vegn a clamar il commembers tier ina radunonza extra ordinaria per decider davart la sanaziun dalla plazza da glatsch. La gliesta da tractandas vegn approbada unanimamein cun strihar las tractandas 9.a) e 10.a). 03. Elecziun da dus dumbravuschs Sco dumbravuschs vegnan Clau Giger e Alois Derungs elegi unanimamein. 04. Approbaziun dil protocol dalla radunonza generala dils 25 d avrel 2015 Il protocol dalla radunonza generala dils 25 d avrel 2015 vegn approbaus unanimamein cun admetter in cordial engraziament agl actuar Mirco Wolf. 05. Approbaziun dils rapports annuals Raffael Bearth va cuortamein atras ils rapports annuals ch ein vegni tarmess a tuts commembers en fuorma dad ina broschura cun dar la pusseivladad als presents da tschentar damondas ni aschuntar ils rapports. Cunquei chei dat neginas damondas ni aschuntas tiels rapports davart dils presents fa il president Raffael Bearth la proposta dad approbar ils rapports annuals en globa. Ils rapports vegnan approbai unanimamein. 06. Rendaziun dil quen, rapport dils revisurs ed approbaziun Raffael Bearth surdat il plaid al cassier Donat Albin. Il cassier presenta las suandontas cefras dil rendaquen dils 01-04-2015-31-03-2016: Tier entradas da frs. 21'490.75 ed expensas da frs. 18'139.30 seresulta in surpli d entradas da frs. 3'351.45. La bilanza pils 01-04-2016 schai tier in surpli activas da frs. 30'405.55. Silsuenter surdat Raffael il plaid al revisur da quen Gion Simeon. Il revisur da quen informescha che Manuel Reichenbach ed el seigen stai tiel cassier a reveder il quen. Gion sa rapportar ch il quen ei menaus schubers ed exacts e ch ils mussaments ein avon maun. Il cassier ha saviu dar sclariment a tuttas damondas. Als revisurs ed al cassier eis ei dau en egl ch il quen d electricitad seigi staus in bien ton pli bass ch ils onns avon. Il cassier hagi contactau la Repower per s informar sche il quen seigi cumplets. Il motiv ch il quen ei aschi bass, ei che nus havein dapi in onn sut controlla ils problems cul scaldament aschia che lez ha duvrau in bien ton pli pauc electricitad. Il revisur menziuna ch il sulet quen che maunchi seigi il qual per l affitaziun dil glatsch a Mustér, aschia ch ei vegni aunc ina pintga summa vitier. Vitier fa el menziun che l amortisaziun dalla hypoteca seigi segir era stau prudent tier da quels buns quens sco quei onn. Ils revisurs da quen fan la proposta da approbar il quen aschia sco il cassier ha prenstau el ed engrazian gorndamein al cassier Donat Albin per sia lavur.

Raffael Bearth fa la proposta dad approbar il quen ed dar scarica al cassier Donat Albin. Il quen vegn approbaus unanimamein. 07. Elecziuns a. actuar Mirco Wolf ha buc abdicau aschia ch ils presents reelegian el per in ulteriura perioda d uffeci da dus onns sco revisur da quen. b. in revisur da quen Gion Simeon ha buc abdicau aschia ch ils presents reelegian el per in ulteriura perioda d uffeci da dus onns sco revisur da quen. 08. Mutaziuns a. entradas Raffael informescha chils quater giuvens Joschua Lombriser, Fabrizio Della Valle, Mauro Alig e Damian Degonda han interess da daventar commembers activs dall Uniun da scursalets Trun. Ils quater giuvens han gia dau ina sesiun cun l emprema equipa. Vinavon havess il giuven Ursin Bundi, che vegn dils juniors, plascher dad entrar ell uniun. Ils presents prenden si ils tschun giuvens unanimamein ell uniun. b. extradas Il president informescha ch el hagi survegniu neginas damondas d extrar dall uniun. 09. Orientaziun project da sanaziun a. plazza da glatsch Quella tractanda ei vegnida strihada all entschatta dalla radunonza generela. b. Zamboni Il president surdat il plaid a Mirco Wolf. Mirco informescha il presents sur dil stan dalla maschina da glatsch, la quala havess basegns d ina gronda revisiun. Mirco Informescha ch il specialist da maschinas da glatsch Züko ha merau atras la maschina e fatg duas offertas all uniun. Tier la maschina fuss ei da reperar bia componetas dalla hidraulica, midar enzacons tocs dil motor ed ina gronda revisiun dil carr per prender si la neiv, il schi numnau Hobelgerät, ed aunc enzacontas autras caussas. Vinavon informescha Mirco d avart las offertas retschevidas. - 1. offerta: revisiun dalla maschina el liug ca. frs. 18'000.- - 2. offerta: revisiun dalla maschina ter la Züko a Wetzikon ca. frs. 22'000.- Era ha la Züko offeriu ina maschina occasiun ch ei a Wezikon per frs. 70'000.- ed ina nova maschina dalla marca Zamboni per frs. 160'000.-. Suenter la presentaziun dallas opziuns dat Mirco liber la discussiun. Il presents ein pertscharts e d accord ch ei sto dar ina sligiaziun davart la maschina. Denton giavischa la radunonza da sclarir uteriuras pusseivladads sco per exempel: - cumprar ina maschina sin credit, leasing - prender si a tscheins ina maschina dalla Züko per sesiun - occasiuns en tiara tudestga ni ell autria ni ord igl internet - ina maschina pli pitga - dumandar siauters clubs ni autras patineras Il president fa la proposta dad ir vinavon cun tractanda 10. b) aschia ch il cassier sa presentar co la suprastonza ha mess avon da finanziar aschia ina maschina. E che la suprastonza pren anavos la damonda da credit per l offerta presentada e da stuschar la decisiun sin la radunonza extraordinaria ch ei planisada. Aschia ha la suprastonza temps da s informar davart ils puncts giavischai.

10. Conclus e credit a. plazza da glatsch Quella tractanda ei vegnida strihada all entschatta dalla radunonza generela b. Zamboni Donat Albin declara cuortamein co la suprastonza ha previu da finanziar ina maschina da glatsch. Dad ina vart eis ei segir previu da puspei far ina fiasta da glatsch en combinaziun cun il giubileum da 55 onns da l uniun e cun il giug dallas 1000 rundas. Vinavon di Donat ch ei dess la puseivladad da recaltgar daners sin ina plattafuroma da crowdfunding, cun damondas da finaziaziun alla vischnauncada Trun e Trun Turissem ed il sportfond, cun brevs ell entira vischnaunca e secapescha era cun domondas da sustegn als sponurs. Sin fundament da quellas caussas previdas ha Donat calculau cun entradas da frs. 24'500 tier expensa da frs. 22'000 che la revisiun dalla maschina custass. Il president di ch il conclus vegn stuschaus sin la radunonza extraordinaria sco menziunau avon. 11. Sesiun 2016/17 Informaziuns dils trenaders/responsabels a. scola da patinar GKB (Silvio Albin) Silvio Albin menziunescha ch ei fuss d informar las scolas pertuccond la scola da patinar en fuorma da fegls sgulonds e placats. Quei stoppi denton schabegiar sin che la scola entscheivi puspei la stad. Era seigi da merar cun Mustér da saver affitar il glatsch regularmein per la scola da patinar. b. juniors e scolars (Raffael Bearth) Raffael menziuna ch ei seigi vegniu entschiet pulit tard cun ils trenaments la sesiun vargada e ch el lessi entscheiver la sesiun vegnenta pli baul a trenar sil glatsch. Vinavon di el ch ei seigi vegniu il giavisch dils juniors da far il trenaments si Mustér sche pusseivel avon miezdi e bu da miezdi. c. emprema equipa ( Clau Giger) Sco emprem informescha il president che l emprema equipa ha giu ina sesida per encurir sligiaziuns co ei savess ir vinavon cun quella equipa cun quei che la partizipaziun e la tenuta dall equipa ei bu stada fetg cuntenteivla la sesiun vargada. Sin fundamenta da quella sesida informescha Raffael che la suprastonza ha ponderau da midar il num dallas duas equipas da l emprem ed dils seniors en Trun 1 e Trun 2. Trun 1 dess daplirs giugs ed encunter pli ferms adversaris en cumperegliaziun cun Trun 2. Vinavon di Raffael che la suprastonza vegli cun quella midada dar la pusseivladad als giugadurs da decider sez en tgei equipa ch els vulan dar ed entras quei contonscher ina megliera participaziun als giugs en omisduas equipas. Raffael dat liber la discussiun per prender posiziun tier quella idea. Ord ils inpuls da quella discussiun ed era sin giavisch da l equipa dils seniors decida la radunonza da schar las equipas sco ellas ein ed encurir autras pusseivladads da megliurar la situaziun. Raffael surdat il plaid a Clau Giger. Clau menziuna aunc inaga che la tentutta dalla sesiun vargada seigi buc fetg cuntenteivla e ch ei stoppi dar magliur en quella caussa e che mintgin stoppi era prender sez pil nas e separticipar stediamein als giugs. Vinavon di Clau ch el speri sin bien luvrar ensemen cul Daniel Monn che organisescha danovamein ils giugs per l emprema equipa e cul responsabel dils seniors, Pascal Albin.

d. seniors (Pascal Albin) Pascal Albin admetta il giavisch che la suprastonza encuera ina sligiaziun per coordinar meglierils termins dallas equipas cun ils termins dall uniun. Quei en fuorma dad ina plattafuorma sigl internet nua ch ils responsabels san completar lur termins da giugs per evitar malcapientschas. Vinavon di Pascal ch ei fuss bien sche ils seniors prendessan part als tremanets dils juniors. Secapescha per quels che vulan. Ei fussi segir d aventag e pli interessant pils juniors ch ein adina mo paucs als trenaments. Occurrenzas a. camp da trenament ad Arosa, 26/27-11-2016 Il camp da trenament ad Arosa ha liug ils 26/27-11-2016. b. turnier da s. Stiafen, 26-12-2016 (datum d untgida: 07-01-2017) Raffael Bearth informescha ch il turnier da s. Stiafen hagi liug puspei sco usitau ils 26-12-2016. Il datum d untgida seigi mess provisoricamein sils 07-01-2017. c. Turnier da fierer rudialas, 28-01-2017 (datum d untgida: 4-02-2017) Il president informescha turnier da fierer rudialas ha liug la sonda ils 28-01-2017. Il datum d untgida seigi mess provisoricamein sils 04-02-2017. d. di da skis, 04-03-2017 Il di da skis ha liug ils 03-03-2017. e. autras occasiuns - La lavur cumina sin la plazza da glatsch ha liug ils 23-04-2016. - Fiasta da glatsch ei previda ils 14-01-2017 (datum d untgida: 21-01-2017) 12. Fixaziun contribuziuns annualas La suprastonza fa la proposta da schar las contribuziuns annualas sco gia las sesiuns vargadas. Ils presents dattan suatientscha alla proposta e decidan unanimamein las suondontas contribuziuns per la sesiun 2016/2017: Activs frs. 150.00 Emprendists e students frs. 100.00 Scolars frs. 50.00 + material Seniors frs. 100.00 Inactivs frs. 40.00 13. Varia e tscheina Silvio Albin pren il plaid e fa attents che la pegna el kiosk funcziuna buc endretg e che quei fussi da merar sin la proxima sesiun. Marcus Steiner pren il plaid e damonda sche la suprastonza hagi ponderau tgei far cun la maschina da trer si scursalets. Sche quella vegni revidida ni sch ei detti ina autra sligiaziun. Donat Albin pren il plaid e dat sclariment alla radunonza che la suprastonza ei vid far ponderaziuns da cumprar ina nova maschina. Raffael Bearth pren il plaid ed engrazia el num dalla suprastonza al Roy Vincenz per sia buna lavur ch el ha prestau sur biars onns cun organisar ils giugs dall emprema equipa. Raffael Bearth siara allas 21.15 la radunonza ed engrazia grondamein als commembers per la preschientscha e giavischa a tuts in bien appetit. Trun, ils 19 d avrel 2017 Igl actuar: Mirco Wolf

Rapports annuals Emprema equipa sesiun 2016/17 La sesiun 2016/17 ei la secunda sesiun per mei sco trenader dall emprema equipa. Ina gronda finamira ei d integrar ils giuvens en nossa equipa. Igl onn vargau han els buc propi perschuadiu e perquei vegn quei ad esser igl impurtont questa sesiun. Sco schon las davosas sesiuns havein nus fatg ils trenaments ensemen cun ils seniors. Ils 12 ed ils 20 da november a Flem ed ils 26-27 da november havein nus puspei passentau 2 super dis ad Arosa. Il camp da trenament ad Arosa ha fatg grond plascher. Bien engaschi, buna collegialitad > Ina biala e legra fin d jamna, uonn perfin senza scandals!!!! Ils emprems giugs dalla sesiun havein dau plitost encunter ils Menzlis. Plein motivaziun essan ir a Flem. Cun buna disziplina ed engaschi havein schau neginas schanzas als Menzlis questa sesiun. Suenter che havein muossau als Menzlis ed al Mini Minischter tgi che ha en las caultschas da hockey ella Surselva han ils seniors da Trun stuiu crer vidlunder. Era tier ils emprems giugs da Trun 1 vs. Trun seniors ei clar tgei equipa dalla Surselva ch ei la ferma. Igl emprem giug va 4:0 all emprema, il secund havein lu schau gudignar els dabot 3:4.!!!! Suenter ina seria da (ensesez) mo victorias cun buns e clars resultats essan pinai per Haldenstein. Mesjamna, ils 04.01.2017 entscheiva ei aber a bischar dallas 18:00 a Trun. Ord quei motiv havein buc saviu dar il giug ella arena Albin a Trun ed era buc muossar al Tosio che essan brutal ferms uonn. Senza terrada ella sesiun 16/17 ei la finamira da buca spiarder il klassiker encunter KSC. Quei giug gudignein cun buna prestaziun da giuven e vegl 5:4. Sco schon els davos giugs vesan ins ch ils juniors ein definitiv arrivai ell emprema equipa da Trun. Quei fa grond plascher e vul era dir ch igl UDS Trun ha in bien avegnir. Cun quei che havein buc saviu dar entgins giugs a casa vegn ei puspei tier in giug intern. Ils seniors vulan muossar ch els ein era uonn ina buna equipa. Els han ferdau zuolper tier il secund giug ed vulan ussa muossar als giuvens tgi ch ei ils schefs da hockey a Trun. Quella gada havein aber buc schau gudignar els. Gia paucs dis pli tard han ils seniors puspei la schanza da pitgar nus. Tatsächlich gudognan els cun 5:3. Quella victoria dils seniors dat da tschintschar a Trun. Suenter 4 giugs 2:2. Ei sto dar la biala. Ei vegn mess pac in denter l auter entiras rundas da Cordon bleus e Schnitzels. Ei vegn claumau ora dretg e seniester e vilentau in l auter tgei ch`ins sa e po. A Trun ha s. Pieder devastau il glatsch. Ord quei motiv havein empruvau da dar il giug decisiv a Mustér. Mo paucs dis avon il giug ston era ils da Mustér serrar il glatsch. Donn, fetg donn. Ils giugs interns ein stai fetg buns e fairs. In grond cumpliment a tuts. Ils 11.03 havein il tradiziunal giug giu Cuera el stadion encunter KSC. Fuss flot da serrar giu la sesiun cun ina victoria. Mo nus sperdin cun 6:4. Tut buc aschi nausch. Suenter il giug essan sesi ensemen e gudiu in bien gentar, tedlau tier historiunas, schau reviver quella buna sesiun e studiau cons giugs che il Dani Rüfi Monn vegn serraus ella proxima sesiun. 29.11.2016 Trun vs. Menzli Sport 4:1 16.12.2016 Trun vs. Trun seniors 4:0 19.12.2016 Trun vs. Menzli Sport 8:2 28.12.2016 Trun vs. Trun seniors 3:4 (schau gudignar extra) 04.01.2017 Trun vs. Haldenstein buca saviu dar 07.01.2017 Trun vs. KSC 5:4

10.01.2017 Trun vs. Trun seniors 4:3 12.01.2017 Trun vs. Menzli Sport 8:7 17.01.2017 Trun vs. Tamins 4:3 20.01.2017 Trun vs. Black Maple Leafs 5:2 22.01.2017 Trun vs. Mountain Flyers buca saviu dar 24.01.2017 Trun vs. Trun seniors 3:5 02.02.2017 Trun vs. EHC Tschiertschen buca saviu dar 05.02.2017 Trun vs. EHC Tschiertschen buca saviu dar 12.02.2017 Trun vs. Black Maple Leafs 4:6 16.02.2017 Trun vs. Trun seniors buca saviu dar 23.02.2017 Trun vs. HC Tamins 5:4 11.03.2017 Trun vs. KSC 4:6 Spiars 4 Remis 0 Gudignau 9 Buca saviu dar 5 Survegniu Goals 47 Sittau Goals 61 En quei senn less engraziar als giugadurs per quella coola sesiun e per il bien engaschi da giuven e vegl. Stei lucs e bien cletg al proxim. Arno del Curto Seniors Entschatta (emprems giugs ed emprem trenament) Sco pli emprem (avon ch entscheiver a trenar) vein giu dus giugs ordlunder a Cuera. Igl emprem giug vein dau ils 30-10-2016 (vs. Mountain Flyers, spiars 9:3) il secund ils 06-11-2016 (vs. HC Belmont, spiars 6:4). En igl emprem giug vein buca giu grondas schanzas, el secund giug vessan segir fadegiau minimum in pari. Nus essan semplamein buca vegni da far ils gols. Sonda, ils 12-11-2016 vein giu igl emprem trenament cun ils dall emprema. En tut eran ca. 20 participonts. Aschia fa ei veramein plascher da trenar. Ils 19-11-2016 vein giu il giug da revanche a Flem encunter il HC Belmont e puspei spiars cnap cun 3:1. Camp da trenament Il camp da trenament ha giu liug uonn ils 26/27-11-2016 ad Arosa. Per mei persunalmein ei quei stau il meglier camp da trenament insumma. Eran fetg bia glieud ed il Donat ha fatg cun nus super trenaments. La sortida ei stada fetg buna. Tuts ein denton i a létg ad uras aschia che vein era saviu trenar la dumengia avonmiezdi tip-top. La sesiun ei lantschada Il december vein astgau dar 3 giugs a Trun (quei ei buca stau bia il cass ils davos onns). 2 ga encunter l emprema (inaga schizun gudignau) ed inaga vein gudignau cun Safiental Phaidros 8-1. Silsuenter vein giu il pli grond success dalla sesiun: A casa vein battiu ils Mountain Flyers en in fetg spèrt giug 3:2. Quei ha lu dau slonsch pil proxim giug (che nus vein giu in di suenter), nua che vein battiu ils New City Ravers cun 7:0. Damai che treis giugadurs han sefatg mal en quei giug, devan il davos mo pli en 7! Vinavon ha la sesiun cuntinuau cun in ulteriur giug encunter l emprema (spiars 3:4).

Silsuenter vein gudignau ils davos 5! giugs in suenter l auter. Per part vein mussau tier quels giugs fetg buna morala (cun SC Trumpf eran anavos 2:4 e vein aunc gudignau 7:4) e secapescha in fetg bien spért d equipa. Fazit dalla sesiun Sundel fetg cuntents sun las sesiun vargada e quei buca mo, aber era pervia dils resultats. Deplorablamein vein puspei giu blessai e malsauns ch ein curdai ora per part ualti ditg. Jeu sperel che quels mantetgien il plascher e seigien l auter onn puspei voll dabei Sera familgiara e fiasta da glatsch Damai ch jeu manegel ch ei vegni scret en quei cudischet avunda sura dalla fiasta da 55 onns UDS Trun, scrivel buca memia bia. In cordial engraziement a tut quels ch han gidau tier il fetg bien gartegiar da quella fiasta (incl. dunnas ed amitgas ch han surviu, menau la bar e gidau da far uorden). Quei ei stau super ed ha fatg mei fetg loschs dad esser in commember da quell uniun. In cordial engraziament a Roy per l organisaziun dil camp ad Arosa ed al Donat per ils tremanents - a Sabina Caduff, Ursina Lutz ed a mia dunna Adriana per il lavar las monduras a nies comité a Silvio Albin, Gusti Nay e Clau Giger (incl. gidonters) per il far glatsch (grondiusa lavur) a Renato Della Valle per il schular tut nos giugs (super che Ti eis anavos tier nus!) a Clau Giger per la collaboraziun ed a tut ils giugadurs dall emprema ch han segidau cun nus. datum liug casa hosp resultat 30.10.2016 Cuera (O A) Mountain Flyers Uds Trun seniors 9:3 06.11.2016 Cuera (O A) HC Belmont Uds Trun seniors 6:4 19.11.2016 Flem Uds Trun seniors HC Belmont 1:3 16.12.2016 Trun Uds Trun a Uds Trun seniors 4:0 28.12.2016 Trun Uds Trun seniors Uds Trun a 4:3 30.12.2016 Trun Uds Trun seniors Safiental Phaidros 7:0 06.01.2017 Trun Uds Trun seniors Mountain Flyers 3:2 07.01.2017 Flims New City Ravers Uds Trun seniors 1:8 10.01.2017 Trun Uds Trun seniors Uds Trun a 3:4 20.01.2017 Trun Uds Trun seniors New City Ravers 7:4 22.01.2017 Trun Uds Trun seniors SC Trumpf 11:4 24.01.2017 Trun Uds Trun a Uds Trun seniors 3:5 29.01.2017 Grüsch SC Trumpf Uds Trun seniors 4:7 11.02.2017 Flem Uds Trun seniors Safiental Phaidros 6:4 gudignau/pari/spiars: 9/0/5 gols sittau-survegniu: 69-51 gols per giug sittau-survegniu: 4.9-3.6 participaziun en media: 10.3 giugadurs per giug (seniors) Il cau: Pascal Albin Juniors e scolars sesiun 2016/2017 La sesiun dils juniors ha entschiet ensemmen cul tscheiver ils 11-11-2016 en fuorma d in trenament da schetg en halla da gimnastica dalla Casa Depuoz. Planisai eran sco mintg onn dus trenaments ad jamna, in il mardis ed in il venderdis, sche pusseivel sil glatsch e da mal aura respectiv temperaturas cauldas en Casa Depuoz. Medemamein era previu d ir naven da fin november ina ga ad jamna silla patinera da Mustér entochen ch il glatsch a Pustget era si. Favugn e temperaturas entuorn 15 grads

celsius han denton era impediu igl Albert Sgier da far glatsch, malgrad l installaziun per glatsch artificial. Aschia era il glatsch a Mustér grazia allas grondas breigias da nos Ismeisters, dil Silvio e dil Gusti la finala buca pinaus avon il nies ed igl emprem trenament sin glatsch ha giu liug ils 10 da december silla patinera a Trun. Ils juniors han adina muossau fetg buna disciplina e plascher da dar hockey. Per l emprema gada havein era integrau ils scolars pli vegls els giugs amicabels denter l emprema ed ils seniors, aschia che quels han saviu rimnar empau experientschas da giug, tgei ch ei adina vegniu menziunau sco giavisch. Sch ins ha contemplau sco els devan savein nus segir mirar positiv el futur. En quei senn lessel era engraziar fetg als trenaders per lur engaschi en favur da nos juniors. Giugadurs : Decurtins Mattia Maissen Lian Lombriser Jeremy Alig Livio Demont Curdin Schmed Alessio Demont Dumeni Schmed Pablo Decurtins Enea Trenaders Albin Donat Tuor Luzian Lutz Otti Vincenz Philippe Tuor Curdin Bearth Raffael Il responsabel: Raffael Bearth Scola da hockey Banca Cantunala Grischuna Dapi onns puspei inagada in rapport zun legreivel. Las bunas relaziuns da l aura han possibilitau che nus havein saviu entscheiver gia las sonda, ils 10 da december 2016 cun ils trenaments silla patinera a Trun (Mustér ha e saviu arver la patinera artificiala per sin quei di). En tut havein nus saviu far buca meins che 13 trenaments (onn vargau tschun) entochen ils 8 da fevrer 2017 sil glatsch a Trun. Buca meins che 18 buobs e buobas han fatg diever da quella purschida. Da quei legreivlamein 11 novizs ni novizas e 7 che han priu part gia ils onns avon. Da quels 18 eran 7 buobas ed 11 buobs. Plirs buobs han buca mo vuliu emprender da patinar mobein era da giugar hockey. La gronda part dalla buobanaglia deriva da Trun. Lu denton era participonts da Breil e schizun si da Glion. Il punct culminont per la buobanaglia ei bein stau da saver sepresentar a caschun dalla fiasta da giubileum da 55 onns Uniun da scursalets Trun avon in pli grond publicum. Ils 26 da schaner 2017 ha l Eva Cavelti fatg ina viseta cun in grond diember da Sport Kids alla scola da hockey. E tgi sa, forsa han in ni l auter affon survegniu tschaffen da prender part la sesiun proxima dalla scola da hockey? Ils buobs plein engaschi Ils Sport Kids cun Eva Cavelti fan ina viseta alla scola da hockey dalla Banca Cantunala (26-01-2017)

La scola da hockey dalla Banca Catunala tiel davos trenament dils 8 da fevrer 2017 Duas gadas ei ils affons sepinai sin igl expert dalla scola da hockey che haveva annunziau da far ina viseta per examinar nies menaschi. Denton, l emprema gada ha el schau perstgisar e la secunda gada eis el buca cumparius, senza da part daco. Per il menader dalla scola da hockey ha quei vesiu ora sco sch el havess teniu ils affons pil narr. Duront ils trenaments haiel jeu giu grond sustegn digl Otti Lutz, digl Ignaz Lombriser, dil Curdin Tuor e dil Clau Giger. Grond engraziament persuenter. La participaziun dalla sesiun 2016 2017 dat naturalmein curascha da cuntinuar era el futur cun la scola da hockey dalla Banca Cantunala. Ei fuss denton plaunsiu uras da remplazzar il menader entras forzas pli giuvnas. Il menader: Silvio Albin Sesiun da glatsch Fin november havein sprizzau l emprema gada il glatsch a Trun. Suenter ina liunga perioda da bassas temperaturas era la tiara schelada e pinada per la sesiun da glatsch. Uonn havein buca giu in fundament da neiv ed aschia in relativ maluliv terren. Mo era quei ei negin problem per il team da glatsch da Trun. Suenter in intensiv temps da sprizzar havein saviu far diever l emprema gada dil glatsch ils 10.12.2017 cun in trenament dalla scola da patinar. Era uonn ha ei dau sco mintg onn hochs e tiefs, aber era puspei la gronda finamira da saver menar atras tut las occurenzas e da haver in perfect glatsch. Détg e fatg.!!! La sesiun da glatsch 2016 /17 havein giu aviert la patinera sur 49 dis. En quels ca. dus meins havein menau atras las suandontas occurenzas. - Turnier da s. Stiafen - Fiasta da giubileum - Turnier da fierer rudialas - Scola da patinar - Giugs 1 equipa e seniors

Deva ei ina lavur ni l autra da far, hai jeu selubiu da clamar ensemen ils giugadurs dall emprema equipa per agid. Hai adina giu il sustegn d in bien team che ha luvrau fetg bein. Sperel che savein era quintar cun vies agid la proxima sesiun sco era tier ina evtl. sanaziun dil plaz da glatsch questa stad. In grond engraziament al Silvio ed il Gusti per lur grond engaschi. Insuma in grond engraziament a tut quels che han segidau. Seigi quei da better ora la neiv, da nudar giu il glatsch, da sprizzar il glatsch ni las lavurs ch ein vegnidas fatgas duront la sesiun. il responsabel: Clau Giger Turnier da premis dils 26-12-2016 Igl onn vargau hai jeu scret en miu rapport: Unglaublich, denton pil ver; il turnier da s. Stiafen ha uonn era propi giu liug il di da s. Stiafen!!!. E tgei eisi uonn? Gie, era uonn ha il turnier giu liug da s. Stiafen! Dus onns in suenter l auter, verruct! Vegn gie gleiti ina tradiziun ch il turnier sa propi vegnir menaus atras il di previu! Dad aura ideala havein saviu beneventar 14 equipas e fetg biars aspectaturs al turnier da salamis. 14 equipas munta in niev record dils davos siat onns! Nus havein entginas equipas ch ein fetg fideivlas e fan gia dapi onns part al turnier, e legreivlamein novas ch ein vegnidas vitier. Fa naturalmein grond plascher a nus ch il turnier vegn schazegiaus taluisa. L equipa da «Spazial senza Schmed» ei era uonn ida per la plema, malgrad ni cunzun pervia ch il Schmed muncava. Las partidas ein danovamein vegnidas giugadas a moda e maniera fetg amicabla, ei regia insumma ina grondiusa atmosfera duront quei di alla plazza da glatsch. Grond engraziament a tuttas equipas ch an priu part, a tuts ch an segidau quei di sin ina moda ni l autra ed als numerus aspectaturs ch ein vegni sperasvi per beiber in sitg e merar il Spengler Cup da Pustget. HC Bertaggia Fans dil Vinnie Mac Igl organisatur: Donat Albin Turnier da fierer rudialas Suenter ch il turnier da premis e la fiasta da glatsch inclusiv disco sil glatsch ha tut saviu vegni menau atras il datum previu fuss ei atgnamein bunamein stau intec kitsch sche nus havessan aunc saviu far il turnier da trer rudialas il datum planisau. Denton propi, sch ins ha inaga in lauf, lu vegn ins stedi da mantener quel duront ina entira stagiun, buca mo ord vesta sportiva. Ils 28 da schaner pia, pilver il davos di che havein saviu far diever dil glatsch suenter ina liunga perioda da temperaturas freidas,

ein las 12 equipas serimnadas allas 10.00 a Trun Pustget, tgi cun lur atgnas rudialas e tgi cun lur atgna butteglias da thermos emplenida cun aua da laghetg. Danovamein partidas si en duas gruppas, han las mintgamai 6 equipas dau dus giugs encunter mintga ulteriura equipa ord lur gruppa. Suenter che tuts havevan pia dau 10 giugs ei vegniu quintau ora la tabella provisorica. Las duas equipas ord mintga gruppa plazzadas il meglier han dau il final respectivamein il giug per il tierz plaz. El final pign ha Holzmichel pitgau ils Lufs ed en in final da Hitchcock ha RESI gudignau encunter ils Ismeisters, quei suenter ch ei steva alla fin da quater passas pari ed il giug ha stuiu ir en ina prolungaziun da duas passas. Engraziel fetg alla equipa dils seniors e tuts ils gidonters che han segidau cun grond anim che era quella occurenza ei gartegiada grondiusamein. Il punct culmimont da quei di ei secapescha stau la repetiziun dil sketch da Fischer Bettwarenfabrik dil Beni Simeon. Gruppa A Gruppa B Schnauser Hallabalusaboys Ils schuloris Ils lufs RESI Bugliottas Holzmichel Las Lieurs Caffee Luschtig Ups sai buc! Kübelzuescalieurs CB Trun seniors Ismeisters 2017 Ei va per millimeters! Concetraziun totala! Igl organisatur: Raffael Bearth Festivitads 55 onns Alla radunonza extraordinaria ha la suprastonza informau ch ei detti puspei ina fiasta da glatsch en combinaziun cul giubileum da 55 onns dall uniun. La radunonza ha lu elegiu Curdin Tuor, Renzo Albin, Dario Albin, Mauro Alig e Mirco Wolf el comite d organisatziun. L idea ei stada dad organisar ina fiasta da gltatsch per recaltgar daners per la nova maschina da glatsch e per festivar ils 55 onns dall uniun. Nus dil comite d organisaziun havein quintau che quei detti ina pintga fiasta e che quella seigi organisada en duas sesidas. Denton ha gia l emprema sesida purtau da bia ideas aschia ch ei ha dau ord ina occurrenza gest treis occurrenzas ed ord ina sesida massa sesidas. Il venderdis sera ils 13.01.2017 ha l emprema occurrenza, la sera famigliara, lantschau las festivitads da 55 onns. Ina tala sera ei grev da menar atras senza igl agid dad autras uniuns e da voluntaris. Il comite ha dumandau si las uniuns dil vitg sperond che ina ni l autra uniun segidi cun nus ni s engaschi cun ina producziun vid il program dalla sera. Legreivlamein ein aschi biaras uniuns s annuziadas aschia che las ideas da giugs dil comite per quella sera han cumpletamein stui vegni strihadas. La salla dil center communal era emplenida bunamein tochen sil davos plaz. Ils hosps ed las uninus han saviu guder ina fetg biala sera. Suenter quella grondiusa e strentga sera eis ei iu vinavon la damaun baul cun las preperativas dalla secunda occurrenza. Per tgi gia avon las 5 la damaun cun better ora neiv e per tgi intec plitard cun las ulteriuras preperativas. Entuorn las 11:00 uras ein lu era ils emprems hosps vegni, denter auter era las uniuns che han priu part als giugs dallas uniuns che han giu liug sin la patinera. Era priu part a quels giugs ha il Team dils prominents. Legreivlamein havein nus astgau beneventar Guido Lindemann, Matrin Candinas, Isabella Wieland e Dumeni Tomaschett el team da prominents. Ils

commembers d honur da nossa uniun, il club da tennis, la societad da musica, il club da bal e l uniun da giuventetgna han medemamein priu part a quels giugs. Denter ils giugs han era las 1000 rundas pils commembers activs dall uniun giu liug. Ord vesta finanziala la pli impurtonta part da quellas occurrenzas. Grazia a sogn Pieder han era las rundas saviu vegnidas manadas atras. Aschia che segir ina buna part dalla nova Zamboni ei cuvretga gia cun las rundas. Cun la rangaziun dils giugs denter las uniuns e cun ina buna tscheina ei la secunda occurrenza ida a fin. Ina fin ei ina nova entschatta ed aschia ha il program da quellas festivitads continuau cun la disco sil glatsch. Entgins (ni forsa era mo in ) dil comite d organisaziun quintavan cun varaga 600 hosps a nossa disco. Gest aschi biars han bu anflau la via tier la patinera. Denton astgein nus tuttina esser cuntents cun quei diember da hosps ch ein stai. In fiasta che vegn forsa era organisada el futur sin nossa patinera. Cun la disco sil glatsch ein las festivitads dil giubileum da 55 onns idas a fin. Aschia ch igl ei mo pli restau da rumegiar naven tut la rauba e far uorden sin ed enturon il glatsch. L uniun astga merar anvos sin treis occurrenzas ch ein gartegiadas grondiusamein. Tut quei fuss buca stau pusseivel senza tut quels voluntaris e las uniuns che han segidau cun nus. A tut quels in grond engraziament pil sustgn! Denton il pli grond engraziament va a vus. A tut il commembers dall uniun da scursalets Trun. Aschia in grond engaschi da tut ils commebers ei propi enzatgei tut special. Quei sustegn da vossa vart ha purtau ina buna atmosfera en nossa uniun duront las festivitads sco era pigl avegnir dall uniun. Per tut vies engaschi duront quellas festivitads engrazien nus dil comite e dalla suprastonza grondamein! Era in grond engraziament viu jeu admetter als commembers dil comite d organisaziun per la grondiusa lavur prestada e per tut il temps che vus haveiss stuiu unfrir pil beingartegiar da quellas occurrenzas. Sco era a mes collegas dalla suprastonza per lur grond sustegn duront quei temps! Il schef dil comite d organisaziun: Mirco Wolf Kiosk Per il menaschi dil kiosk sei naturalmein stau ina sesiun formidabla. Bunamein 50 dis ei la patinera stada aviarta e la gronda part dallas occurrenzas e dils giugs planisai han giu liug. Naturalmein ei quei stau ina gronda truscha per il persunal dalla ustria. Muort la munconza da neiv ei il december staus in meins che la patinera ei stada frequentada fetg bein d affons e carschi. Ils 22 da december ha schizun la scola superiura da Rueun fatg ina viseta silla patinera a Trun. Era la reclama entras Surselva Turissem ha giu in effect positiv. Denter Nadal e Daniev havein schizun giu jasters ch eran a Vuorz en vacanzas ed ein sin fundament dallas informaziuns sin internet vegni ina sera a Trun per patinar. Insumma, la communicaziun sin internet respectiv la homepage da nossa uniun sur dalla situaziun dalla patinera vegn legida stediamein. Grond engraziament al Donat per sia lavur d actualisar mintga di la hp. Las entradas per patinar, l affittaziun da patinas, ils giugs da hockey, las seras da fondue ed ils turniers da premis da s. Stiafen e quel da fierer rudialas han procurau per ina sviulta da rodund 19'000.- francs duront la sesiun vargada. Jeu saiel buca seregurdar che nus havein giu enzacu ina tala entrada. Legreivla ei era la participaziun dallas seras da fierer rudialas stada. Sper las equipas da Holzmichel e Resi, che fan dapi onns part da quella pusseivladad da trenar, ein uonn aunc vegnidas vitier ina gruppa da Schnaus e duas equipas da Trun. Quater guppas ni uniuns han fatg part dalla purschida da rudialas e fondue: - 21-01-2017 Uniun Sportiva Rabius - 25-01-2017 Persunal Banca Raiffeisen Cadi - 30-01-2017 Uniun da gimnastica Alpina Trun - 13-02-2017 Equipas Clau Rensch (Resi)e Robert Cathomas (Holzmichel)

Gronda lavur pil kiosk fan naturalmein la Sabina e siu consort Marcus Caduff. Cunzun duront il di, en specialmein las mesjamnas, sondas e dumengias ei propi la Sabina il motor dil menaschi d ustria e dil kiosk. Adina hai denton sporadicamein era auters commembers che segidan a dar ora bubrondas ni maglias. Alla Sabina ed il Marcus sco a tut ils auters in grond engraziament. In grond engraziament naturalmein agl Ernst Berner, miu fideivel gidonter dallas seras da fondue. Uniun Sportiva Rabius (seniester) e las equipas da fierer rudialas Resi e Holzmichel (dretg). Igl Ernst Berner (foti dretg sin peis) ei buca mo in oreifer cuschanier da fondue mobein era in zun versau Conférencier. In special engraziament lessel jeu admetter agl Ysmeischter Clau Giger per l organisaziun da far glatsch e da rumiar la neiv. Nus havein giu in buna e zun emperneivla collaboraziun duront l entira sesiun. Il responsabel: Silvio Albin Rapport dil president Encunter primavera havein realisau entgins puncts tematisai e giavischs menziunai alla radunonza generala vargada davart il commembers e responsabels. Per che giugs dils seniors e dall emprema vegnien buca tschentai sil medem di ni era per evitar che auters termins interns setaglien, ha il Donat creau ina plattafuorma online, nua che mintga cau sa purtar en ses termins, che vegnan suenter vesi da tschels responsabels. Plinavon havein fatg reclama per nossa uniun enten crear in flyer, il qual nus havein silsuenter termess en mintga casada dalla Cadi, in giavisch dil Silvio che ei cunfrontaus directamein culla digren da vegnents suenter sco menader dalla scola da patinar e hockey da GKB. Vinavon havein nazegiau ina buna acziun da Ochsner Sport e cumprau ina nova maschina da trer si scursalets, sin la quala ils interessai han survegniu ina instrucziun dil meinafatschenta digl Ochsner Hockey Pro Shop da Cuera, il Michi. Il Markus Steiner ed il Marcus Schmed ein quella sera sedeclarai promts e tillan dapi lu si cun egl scolau scursalets per 10 francs il pèr. El focus dalla sesiun 2016/2017 dalla Uniun da scursalets Trun steva denton oravontut nossa buna, denton veglia maschina da glatsch Zamboni. Suenter 21 onns en nies survetsch ed adina dapli donns e reperaturas, havein nus stuiu sedumandar, sch ei vali aunc d investar daners en quella maschina. Ina revisiun havess cuostau a nus pli che 20'000 francs, tgei ch ei capeivlamein vegniu refiers alla radunonza generala 2016. Aschia ei la suprastonza, ordavon nies actuar ed empriu mecanist Mirco, sefatga silla tscherca d alternativas. Per saver presentar als commembers tut las pusseivladads, seigi quei la cumpra d ina maschina rest nova, la cumpra d ina occasiun, l affitaziun ni leasing d ina maschina etc., ei il Mirco staus biaras uras sin telefon ni sesius ensemmen cun in representant dalla ZÜKO. A caschun d ina radunonza exraordinaria ils 1 da settember 2016 ella Casa Tödi havein nus saviu metter avon las opziuns ed ils presents han votau unanim per ina Zamboni d occasiun en in fetg

bien stan per rodund 35'000.-. Quei corrispundeva secapescha buca al budget digl UDS ed aschia ei la medema sera vegniu fundau in comite per l organisaziun d ina sera familiara ed ina fiasta da glatsch per finanziar la nova maschina da glatsch. La ZÜKO, che haveva reservau la maschina per nus per in cuort temps, havein informau davart nossa decisiun ed ils 13 da november ein il Mirco e nies commember e maschinist d autos da vitgira Dumeni Candinas semess sin viadi enviers Wetzikon e la medema sera han els saviu scargar la nova Zamboni sin sia nova plazza da lavur a Trun. A quella caschun in grond engraziament a Candinas SA per il sponsuradi dil transport. La sera familiara ha giu liug venderdis sera, ils 13 da schaner 2017. Donat e Renzo han menau la sala pleina entochen sil davos plaz atras in vast programm cun sketchs, producziuns musicalas e producziuns da cant dallas differentas uniuns dil vitg. La fiasta da glatsch ha giu liug il di sissu. Cunquei ch ei haveva denton neviu l entira notg ualti intensiv ein certins i directamein suenter la sera familiara a better o la neiv dil glatsch. Ei leva denton gest quella fin d jamna buca callar da neiver ed in cuort mument stevi ualti onsum da stuer dar giu, denton entras il grond engaschi da propi finadin e traso puspei better o neiv havein nus pli u meins saviu tener liber il glatsch. Malgrad la mal aura e grazia a nossa ustria scladada han tuttina biars visitau nus, denter auter era nos prominents Martin Candinas, Isabella Wieland, Dumeni Tomaschett e Guido Lindemann. Lez ha schizun envidau en nus da passentar nies proxim camp da trenament gratuit en siu garni. Aschia han era ils giugs denter las uniuns ed il giug da 1000 rudas giu ina massa aspectaturs. Serrau giu quella fin d jamna havein cun ina disco sil glatsch, ina premiera lunsch entuorn. Engraziel fetg a tut il commembers, entschiet en tier ils juniors, ils activs, ils seniors entochen tier ils commembers d honur, per igl engaschi duront quels dis. Era buca d emblidar las partenarias da nos commembers e las uniuns da Trun che han gidau a nus. Senza vus fuss ei buca stau pusseivel da menar atras in programm aschi plein. Ina fotografia che muossa il spért ch ei sefuormaus egl onn da giubileum da 55 onns e cunzun duront la fiasta da glatsch enteifer l uniun da scursalets: 22 commembers segidan la dumengia suenter la fiasta da glatsch da far uorden, quei beincapiu suenter 72 uras intesivas e cuortas notgs. Igl engaschi ed il setener ensemmen ei staus exemplarics e savess far scuidus enqual autra uniun. Era ord vesta sportiva e meteorologica ei la sesiun stada in success: gudignau biars giugs, saviu menar atras tuttas occurrenzas il datum planisau e giu naven dall entschatta december entochen fin schaner temperaturas freidas ed aschia saviu arver la patinera tons dis sco biars onns buca pli ed ei era adina stada frequentada fetg bein. Sulettamein il di da skis ils 4 da mars ei curdaus empau ell aua. In ulteriur schabetg negativ ei stau igl accident silla patinera da nies commember Claudio Maissen el temps privat ils davos dis digl onn 2016. Legreivlamein ha el giu cletg el discletg e sesanflava gleiti puspei silla via da megliurament. La sera dils 4 da mars, pia suenter esser turnai digl après-ski, havein

aunc festivau la finiziun dalla sesiun el Tschèser e gudiu in raclette en accumpignament da nossas partenarias. Il president, Raffael Bearth

Engraziament Alla fin dalla sesiun vala ei secapescha dad engraziar a tuts. Specialmein engraziel jeu a: Mes collegas da suprastonza, Donat Albin e Mirco Wolf Als revisurs da quen Gion Simeon e Manuel Reichenbach A tuttas persunas che han surpriu in post per noss uniun (trenaders, responsabels pil glatsch, kiosk, schulitgaders, gidonters e gidontras, organisaturs da giugs) Als responsabels per la pagina d internet A Sabina e Markus Caduff pil grond agid el kiosk A Silvio Albin ed Ernst Berner per las seras da fondue A Daniel Tuor, sco cassier dil consorzium stabiliments da sport Allas suprastonzas dil Club da ballapei Trun-Rabius e dil Club da skis Trun per la buna e vicendeivla collaboraziun E buc il davos a tut quellas persunas ch jeu haiel senza malaveglia emblidau da numnar specialmein. Trun, ils 3 d avrel 2017 Il president: Raffael Bearth Funcziunaris Uniun da scursalets Trun President Actuar Cassier Revisurs da quen Raffael Bearth, Via Carmanera 11, 7166 Trun Mirco Wolf, Schulstrasse 50, 7130 Glion Donat Albin, Via Fraissens 12, 7166 Trun Gion Simeon, Via Splecs 17, 7166 Trun Manuel Reichenbach, Via Principala 106, 7166 Trun Trenader activs e seniors Responsabel juniors e scolars Responsabel seniors Scola da patinar e hockey Arbiters Clau Giger, Via Principala 69, 7166 Trun Raffael Bearth, Via Carmanera 11, 7166 Trun Pascal Albin, Via Fabrica 8, 7166 Trun Silvio Albin, Via Splecs 132D, 7166 Trun Markus Caduff, Via Fabrica 2, 7166 Trun Renato Della Valle, Via Fabrica 10, 7166 Trun Responsabel glatsch Responsabel kiosk Adressa Commembers d honur Clau Giger, Via Principala 69, 7166 Trun Silvio Albin, Via Splecs 132D, 7166 Trun Uniun da scursalets Trun, Caum postal 85, 7166 Trun Ervin Wolf, Giachen Riedi, Giusep Decurtins, Marcellino Flury, Placi Degonda, Renato Della Valle, Silvio Albin

Uniun da scursalets Trun Caum postal 85 7166 Trun raffael.bearth@bluewin.ch