nr. 102, annada 9, Glion, november 02, pretsch frs. 40.-/onn il proxim puntissimo è : famiglia fin da redacziun per il nr. 103: 12 da november 02

Transcript

1 nr. 102, annada 9, Glion, november 02, pretsch frs. 40.-/onn il proxim puntissimo è : famiglia fin da redacziun per il nr. 103: 12 da november 02 Punts 103 cumpara entschatta december 02

2 INFOS INTERNS dal team da Punts INA LIBERTAD CUSTAIVLA editorial da Rafael Camenisch Punts nr. 101 è cumparida en las chasadas rumantschas senza las grondas midadas spetgadas. Per tut quels ch'èn ussa dischillus vegn ussa la buna novitad: or dad ina lunga sesida cun il team da Punts èn resultadas bunas ideas per divers midaments innovativs. Per tut quels che aman la cuntinuitad: Punts vegn a mantegnair sia lingia e natiralmain er la qualitad! En ils proxims numers vegnis vus, chars lecturs e charas lecturas, a pudair perseguitar ils pitschens midaments che puntists e puntistas vegnan ad elavurar. Sa laschai surprender! "Sortida" è il puntissimo da quest'ediziun in tema che fa part da la giuventetgna sco brumbels ed amurettas. Tge capita sche il sulet local dal lieu è serrà ed i na sa survegn betg l'auto dals geniturs? Co vegn quai ora, sche Hildegard e Clotilda van ensemen en sortida? Il Coro Rumantsch sco alternativa a la sortida 0/8/15? Las respostas chattas sin las proximas paginas. Puntists ch'èn "abroad" san da quintar differentas experientschas da la sortida. A Brighton en Ingalterra van ils giuvens en baselgia en sortida. Almain para quai uschia. Minca (München) porscha la sortida per cigns e da quels che als vulessan anc daventar ballet exclusiv! Tgi tgi è plitost in amant da zanins e hokers auts, quel po accumpagnar noss collavuratur en Italia tras 8 bars a Roma. Ex e hop! Ir en sortida munta plaschair, munta viver, emblidar il lavurdi. Ir en sortida munta er savens tschertgar insatgi per sa paregliar. Sin l'entir mund va la glieud en sortida. Quai n'è insumma betg sulet ina chaussa dals bainstants, insatge che sulet quellas persunas san far che san pajar l'entrada en in local. Cunzunt en tiaras, nua che discos èn sulet in plaid (gnanc da pledar da shows da laser u sumegliant) sa mussa quai: Là vesa il lieu da scuntrada ora auter, fitg auter che tar nus. Las chasas en tals lieus èn savens baraccas, pitschnas e (memia) blera glieud abita in sin l'auter. Uschia daventa la via la stiva ch'els na possedan betg. La via daventa dentant era la disco ed il kino che n'existan betg en il vitg u en il marcau. Ir en sortida munta ir sin via, munta tar glieud che viva en il tierz mund sco era tar nus libertad. Quella libertad vali da giudair perquai ch'ella è bellissima, perquai che las bars èn coolas, ils teaters interessants, ils films en ils kinos fascinants e last but not least perquai che la glieud che nus entupain sin la giassa na vul nagut auter che nus: sa divertir. Bunamain uschè divertent sco ir en sortida è leger las PUNTS 102 che Ti tegns en Tes mauns. Pia, char lectur u chara lectura, giauda era la lectura da quella gasetta giuvna.

3 L'INFLUENZA DIL FRIED DA PÈSCH DURONT INA SERA DA SORTIDA, NI: Ina studia sur l'aschinumnada violenza en bars d'andri Derungs e Sofia Galotti caporedactur Rafael Camenisch Sco mintga sonda sera serenda Hercli Duitg en sia bar preferida "La Bambotscha". Plein plascher anticipau ascenda el la scala ch'ei enturnada cun in tschabergal d'argien. Il local ei fullanaus ed il fried da rentgas marschas penetrescha tras las preits satellas. Probablamein deriva el dil menaschi da pesca vischinont. Il magun da Hercli sesvolva dil disgust. Si'aversiun vegn rinforzada dall'odur da merluz che predominescha da temps en temps il tuffien. Hercli scappa vi tier la bar ed emposta in quintin per tuchegiar il barsau barbiesch ch'el ha spisgentau da tscheina. Profundaus en ses patratgs encorscha el buc igl Austral, in umeneri da varga 120 kilos. Quel seplacca sper Hercli, slucca siu rentamogn e cuspira sia "Marietta sanguinada" ch'era gia semtgada. El para dad esser in hosp-canorta. Damai che Hercli sto prest star a garnugl senta el ina convulsiun ella comba dretga che s'annunzia plaunet. Per prevegnir al mal s'avischinont, scrola el la comba mo senza success! Fermamein patertgond vid la melodiusa musica da cornamusa, emprova el da supprimer il cordoli. "Aaauuuhhh!" La cameriera che haveva gia daditg in hip sin el, damonda cun ina faulsa affabladad suenter il motiv da siu excess. Hercli singlutta dil mal e petga senza fraud ella stgeina digl Austral. Lez, buca maufers, smanatscha cun entginas vigurusas curtelladas. Hercli peglia tema, seglia tut disturbaus giu dalla sutga e scappa en tutta bahuta da scala giu. Per scursanir la via da fuigia vul el siglir acrobaticamein sul tschabergal ora. L'intenziun gartegia denton buca diltut, aschia ch'el scarpetscha e dat en dies da scala giu. Plein consternaziun endriescha la massa dil schabetg, denton buc la sturschida dalla spina dorsala che Hercli ha tratg tier. Oh Gott, tgi havess tertgau che quella sera prendi in'aschi voll crassa vendi per nies pauper Hercli ch'ei toch schiglioc aschi in gmüatlich typ. Cheu san ins seulement dir: "Voll strub, eh!"

4 DA DIRAS SORTS, SORTIDA ED AUTRAS SORTS PLAIDS da Robert Buchli TWO PINTS OF LAGER AND A PACKET OF CRISPS da Sergio Guetg "Jeu mon in tec a sortida quersera!! Ei vegn forsa in tec pli tard mia cara!!" Cun quels plaids sortel jeu da mi'habitaziun. Jeu mon en direcziun Glion nua ch'jeu lessel entupar miu meglier amitg Marcus. "Jeu sortel da quell'uniun e vi mai turnar pli!!" Cun quels plaids sortel dalla sala polivalenta e serendel cun ina stria gretta el venter a Glion en sortida. "Jeu haiel avunda da sortir igl entir di daners!!! Igl ei temps da calar cun nossas sururas ed ir a beiber ina gervosa!" "Ti has veramein ina dira sort!!!" Cun quels plaids sortel da sia casa. Vesend Lucas en sia sutga da rodas a laghegiond ord finiastra seturpegel. Savessel jeu buca semplamein prender el cun mei? Daco vul el buca pli sortir da sia stanza? Damondas nua ch'jeu anflel neginas rispostas. Sedecidel tuttina dad ir persuls en sortida. Haiel gie la finala fatg giu cul Gion. Ei quei pusseivel!!! Tonta glieud en sortida. Ei oz il sogn Sortida? Strusch d'anflar in plaz en quei Hollywood!! Ah bein, leu ei aunc ina meisa libra!! Marcus vegn segiramein a vegnir mintga mument! Ei quei pusseivel!! Strusch da crer che tons Sursilvans ein sorti da lur dimoras talmein carezzadas!! Mo ei insumma aunc enzanua in plaz liber per mei? Ah bein, leu sper il Gion. "Tgau Gion, eis ei aunc liber cheu sper tei?" "Naturalmein, mo sesa!" "Eis persuls?" "Gie, jeu spetgel il Marcus, haiel ditg buca pli viu el!" "Quei constat, el ei era mai en sortida!" Ei quei pusseivel!!! Dat ei quersera enzatgei da gudignar cheu el Hollywood!?! Quei ha gie strusch in plaz! Ah bein, leu ein gie il Gion ed il Giusep. "Tgau Gion, tgau Giusep! Ha ei forsa aunc in plaz tier vus vid la meisa? Gie naturalmein! Has sortiu tochen ussa daners? Ei quei pusseivel!! Cheu san ins gie gnanc dar entuorn!! E negin ch'ins enconuscha!! Ah bein, leu ei il Gion! Mo tgi ei era aunc leu? Quei ein gie il Giusep ed igl Elia!! Quei vegn a dar ina dira sort quersera! Tedlar sco Giusep tschontscha da sia politica e surtut la platta digl Elia cun sias differentas sorts daners! Tgei cletg dat ei era differentas sorts carstgauns!!! "Buna sera ils signurs, ha ei cheu forsa aunc in plaz cheu?" "Ah tgau Marcus, haiel gia spitgau tei daditg!" "Tgau Gion, beinvegni Giusep, salü Elia!!" "Tgau Marcus!" "Tgau Marcus!" "Has buca priu cun tei il Lucas?" "Na el seturpegia creiel jeu in tec dad ir denter la glieud cun la sutga da rodas. Quei ei ina dira sort per el!!" "Daco ina dira sort? El fuss gie l'attracziun en sia sutga da rodas!!" "Enqualga has ti schon buca in tec sentiment per certas situaziuns da veta. Tuts ston buc adina exnum esser el center!!" "Sco ti, mo cuntinuavas, jeu sai schon tgei che ti vulevas dir cun quei. Jeu sun pia buca beinvegnius cheu en quella runda! Havevel gia in curios sentiment cura ch'jeu sundel sesius giu. Tonscha buca ch'jeu sundel sortius da quell'uniun da giuventetgna da cac. Stos uss aunc segrittentar duront la sortida. Pil giavel gleiti!!" Ruaus, negin che vul ni sa dir enzatgei. Giusep stat sin peis e sorta. Era el ha ina dira sort, mo el sorta dil Hollywood senza ch'enzatgi rendess quen da quei!! A Brighton, en martgea an l'engheltera digl Sid, ins vo naturalmaintg er an sorteida. Tranter oter er an lis pi spezials, an baselgia. Font n' Firkin sa nomna la baselgia anglicana digl 19avel tschentaner. Ella sa catta an mez The Lanes, en stupent li, frequento dad indigens e turists. La baselgia è neida biageida anturn an en pub sainza grondas acziuns da protest, perveia da muteivs religious ni perveia da muteivs tradiziunals. Igl Font n'firkin mossa dantant tuttegna anc restanzas e segns tipics tgi laschan ragurdar ad ena baselgia. Per l'egna la loptga, sen chella tg'ins ò en'ampernevla vista sur igl antier pub, e per l'otra igl altar tgi sa catta an mez igl Font n' Firkin. El è circumdo d'ena gronda bar. Lò ins so consumar differentas schorts ava sontga. Ava sontga alcoholica ed ava sontga nonalcoholica, ava sontga an cloccas ni ava sontga or dalla spegna. Fitg popular en igls Pints of Lager (tar nous an las valladas rumantschas schainsa en "Kuebel pir"). Aint igl Font n'firkin èn acceptadas e bagnneidas tottas religiuns e mintgign fò oraziun sen atgna moda maniera e mintgign loda igl agen Dia.Immensas meisas anticas da lagn grev occupeschan igl local. Anturn las meisas èn soptgas cumadevlas, tschertas ins so numnar trons. Pigl solit dattigl betg dispettas tgi tgi po tschantar sen igl tron. Scu tenor igl motto: igl amprem ò la schelta. Las meisas en ornadas cun belezza candeliers e tgaleschs d'argent amplanias cun Crisps (tar nous "pontschips"). Mintg'emda, dalla gievgia seira anfigen la dumengia seira ò li la sontga messa aint igl Font n'firkin. Igl prer, mintg'emda en oter, reiva sen visita. Cun el ò'l dantant betg la sontga scritgiera eclesiastica, mabagn las sontgas scritgeiras digls gronds dias dalla musica, ed ena ghitarra accustica. Igl prer stat davos igl altar e beneventescha tots cun igls amprems accords dad ena canzung digls craps rullonts, digls bulias ni da Jimi Hendrix anfignen tigls amprems accords dad ena canuzung digl retg digl rock n'roll. La messa ò uscheia antschet. Dalunga sa furma en chor, tgi stat cun la vista cunter igl altar. Mintign ò e fò la sia festa.las grondas festas digl onn eclesiastic vignan dantant celebradas sainza prer. Per chest evenimaint reivan an funcziun las televisiuns ed igls screens. Cura tgi la squadra naziunala da

5 Bar Hollywood ha ei aunc plaz per mei? ballape englesa gioia vign festivo Nadal e Pasqua igl madem mument. Tots, vigls e giuvens, gronds e pitschens, gross e stigls, reivan aint igl Font n'firkin, sa vistgias da festa. Tgi porta ena tgapela, tgi ena schlengia ed ena bandiera e tgi t-shirts ni pullovers digls gronds idols da ballape. Tot sagond scu tg'igl gi da ballape vo or, vign simplamaintg, sainza schleta cunsienztga, tatgea ve en de da firo. Schi chegl e betg igl cass, igls giasts e cliaints spetgan simplamaintg sen la proxima gieviga, cura tgi vign festivo l'amprema sontga messa dall'emda. Igl Font n'firkin è egn digls 367! pubs a Brighton, dantant igl sulet cun en'istorgia religiousa davostiers. Sergio Guetg lavoura schiglio an igl Radio Rumantsch. Per amprender angles ò el paccato las sias valischas ed è ia per chesta stad a Brighton. El ò betg angal amprandia igl lungatg angles, mabagn er la cultura da sorteida. Bar Antilia Bar Shishà dapli tar las bars Antilia e Shishà el ROMA RAPPORT sin la proxima pagina

6 THE ROMA RAPPORT: SCHIZ E HIZ OR DA LA SCENA DA SORTIDA DA LA CHAPITALA TALIANA da Pierluigi, Umberto, Gioacchino e Girolamo Roma: il vatican, il forum, il colloseum, il Castel Sant'Angelo, la Fontana di Trevi... mintgin ha gia sentì insatge da quests monuments. Tut auters monuments han quatter desperados rumantschs tschertgà ils monuments da la sortida romana. E per part chattà. Qua lur reportascha... Per las bars vala la suandanta valitaziun: in colloseo è schiz, tschintg collosei perencunter super hiz. Natiralmain èn valitaziuns tranteren pussaivlas Enoteca Trastevere Via della Lungaretta 86 Il num di tut: blers vins, paucas maisas, betg il gust da mintgin differents vins, 140 differentas grappas - vino da l'alto Adige Muller Turrgau... - predschs moderats - local fitg ecologic, cunzunt cun ils pairs per las laternas, mo mintga segunda funcziuna - cun empustar ina biera ha la schefa reagì curius - service ha la spertezza dad ina glimaglia - public: cunzunt yuppies vegls che miran pli gugent sen la blusa da la cameriera sco sin l'etichetta da la buttiglia vin La Buca di Bacco Via S. Francesco a Ripa 165 Il lieu per tuts e tuttas che vegnan da l'autra riva dal Tevere... - num da la bar di quasi tut (la buca= rusnatgil) - interiur: decoraziun fetg moderna e feminina - ils megliers coctails che nus avain empruà cun nums fitg erotics sco "Venus", "Eros", "Afrodite" garnì cun ils fretgs da l'amur. - schespert ch'il tipo da la bar sa ch'ils giasts èn heteros va la cordialitad a perder - musica: ABBA goes duz duz, e quai tut la sera plus tecno da tut ils stils (duz duz duzduz ni duzduzduz duz z z zduz ni duzduz zduz zduzduz...) Plinavant vegnan ils hiz ed ils schiz da las bars preschentadas. Fitg objectiv sa tgapescha. Ni tuttina subjectiv? Ni a la fin verb? Ni scu adjectiv possessiv?? Mhmm... Basta, autra chaussa: Anc dumondas?? Na?? Lura, ta tegna ferm per las ultimativas bars da Roma!! Trastevere Il quartier per ir in sortida a Roma unic manco: tut las bars serran gia a las Per part èn discos privatas anc avertas fin las Sin in pitschen quartier vegnan x-bars, ina pi speciala che l'autra. Uschè èn ils testers Pierluigi, Umberto, Gioacchino e Girolamo mo spassegiads tras Trastevere. Voilà: Trasté Via della Lungaretta 76 Sala da té e café, er cun bubrondas alcoholicas e quai n'è betg manegià sirup cunter la tuss!! - 33 differentas sorts té, pruvar: il cinese nero - bunischems coctails - coolas düsas!! - mo umens, fiss nagut per Giachen M. - nua è la porta per sortir? labirint in extremis... - pegna radical anarcista, fa tut il temp tge ch'ella vul (explodescha ella ussa ni betg??) Ombre Rosse, Piazza Sant'Egidio 12 In pub sco ch'ins chatta en mintga citad - tualetta cun gronds spievels per ch'ins sa sa contemplar durant far la fatschenta - gronda tscherna; diversas gervosas, divers vins, divers drinks, diversas auas... - geniala plazza avant il pub, cun hippies che fiman cigarettas cun gust da fain, che soltan flot e che vendan art - live bands - glieud che na discurra betg e dorma sut las maisas - düsa less pi gugent ir a chasa sco da servir nus - tualetta extrem ecologica: l'aua va exact 1 sec. Betg fabritgada per chaussas pli grondas Antilia Via della Scala 1 Bar en stil mediterran cun drinks e fingerfood. - entira crew è sturna e ha la pli gronda festa - cunquai che la crew è schi sturna dat ei drinks crassischems (empruvar in giada il "gin e più") - decoraziun bella che dat ina bun'atmosfera - musica n'è betg adina tant buna - la vitrina da chaschiel lascha penetrar in lev gust da pais tras la bar (ch'ins na senta betg pli suenter il segund drink) Shishà Via S. Francesco a Ripa 135 Bainvegnì a Marrakesch! Ustaria e stil arab cun pipas dad aua per fimar. Ins sa senta gist sco in pitschen Mullah u Scheich... (ni forsa sco Osama che fima Shishà en ina tauna afgana???) - carta speciala cun tés chauds e fraids, cun en alcohol ni senza (in pau sco punsch) ma er bubrondas 'normalas' occidentalas - maisas, tapets e pipa èn original arab - musica araba, p.ex. Khaled - extrem patgifica atmosfera per relaxar - prest nagins giasts, mo voyeurs che vulan vesair l'interiur - suenter ina purziun Shishà (ch'ins fema cun la pipa) ins ha il sentiment dad avair maglià 1 kg cravun e fulin Bali Oriental Pub Via del Mattonato 29 Outfit indones, era cun maglia orientala - indonesa, giapunesa, chinesa - atmosfera scu vacanzas sin in insla - drinks orientals cun gusts magari specials - pintgas tribünas cun maisas e suptgas per relaxar - bigliard e table games - il schef è in pitschen tiran. Citat düsa: "Normalmente non c'è, ma oggi rompa le scatole!!" - el intern da la bar: Tge è la tualetta da las dunnas, tge la cuschina? - temperaturas sco en Indonesia, la ventilaziun 'made in Indonesia' na funcziuna betg. Chaud sco en in furnel!!

7 Medioevo Vicolo della Scala 11/A Sco en in chastè medieval, nagina glisch artificiala, mo chandailas. Fitg rustical!! - ina düsa masculina che fa la lavur ed in schef feminin che cumonda - atmosfera speciala er gist cun maglia sco en il temps medieval e da baiver da quel temp - gis per sa trategnair (schach, mulin, etc) - excellents coctails cun nums sco "Merlino" "Tristano" "Parzifal". Pruvar!! - er la tualetta è fitg medievala - ina schefa cordiala, ma ella discurra bler mengia bler: Salveblablablablasiblablablablablablanoblablacomeblabla l'empustaziun ha duvrà memia bler taimp... (curius, cun uschè ina stgella) chabgias da papagagl senza cuntegn; forsa duvrà per cuschinar la tschaina?? E per finir anc quai: La sortida a Roma, quai è la cana. Tantas differentas bars ch'ins sa visitar e far ina flotta festetta... Sche ti es a Roma, betg emblida dad ir a Trastevere... ed emblida cunzunt betg da vegnir or da Trastevere!! Chars salids da Roma da Gioacchino, Girolamo, Umberto e Pierluigi

8 VERSNOBT E 50 ONNS VIGL da Valentina Camous Minca è ancunaschaint per igl sies Oktoberfest. Gliout da tot las naziuns viageschan angal perveia da chesta festa an Teratudestga. Ma igl martgea simpatic ò anc daple da mussar dalla cultura tudestga, tgi bira, gaglignas barsadas ed allianzas d'ena notg. Cultura eneda oter, chegl era igl mies slogan, cun igl qual ia sung eida a Minca. Na, ia leva betg evenimentar igl Oktoberfest, noua tgi la bira corra an mellas hectoliters, noua tgi tonnas da gaglignas vignan barsadas e noua tgi la gliout tschertga igl sies plascheir cun ena allianza, tgi cozza pacas ourettas. Ia leva evenimentar cultura eleganta. E perchegl sunga eida an igl Bayerisches Staatsballett. Tge flair da pudeir antrar an chel bietg bombastic, noua tg'ins vei la prominenza da Minca, ma er gliout da mintga de. Blers portan gardarobas elegantas e da bung gost, dantant tgi oters portan vistgadeira nunspectaculara, scu jeans ed en pullover. Ia tutgiva tar la gruppa numnada igl davos. Igls treis tocs, tg'ia sung eida a vurdar eran: Brahms-Schönberg Quartett cun la choreografia da George Balanchine, In the Night cun la choreografia da Jerome Robbins ed After Dark cun la choreografia da Jacopo Godani. Igls treis tocs eran fitg differents, per mintga gost ensatge. Igl amprem toc vaia via davent digl parket. Igl mies pi grond problem era la bela donna, tgi era carscheida gronda e tgi purtava igls tgavels gugent ad ot. Ia, ena persungigna dad 1.67m na veva naturalmaintg nigna schanza da veir sur la tuttona da chesta donna or. Uscheia am è rasto navot oter, tgi da far gimnastica e strubar la testa d'en mang tar l'oter. Igl sagond e terz toc vaia alloura via davent digl amprem balcung. E perchegl dunga a vous preziadas lectouras e prezios lectours igl tip: pigle u en biglet segl balcon u en gross plimatsch cun vous, per untgier a tals problems! Ma siva da chests treis tocs da ballett, possa trer la conclusiun, tgi cultura eneda oter na stò betg deir, tg'ins stò esser versnobt u forsa 50 onns u pi vigl. Ballett è propi betg dependent dalla vigliadetna. Mintgign so cattar plascheir ve da chest'art... Prue eneda vusoters sez e visite igl bel martgea Minca ed igl ballett bavares.

9 SORTIDA! da Pia Valär PERCHE IR IN SORTIDA? dad Elena Filli 'Restaurant und Bar bleiben heute wegen Privatanlass geschlossen' esa scrit sün ün fögl mellan chi'd es tacho vi da la porta. Super. Sest chera lectura u cher lectur, scha que es l'unica schelta per ir in sortida perche cha prüma esa stagiun morta e seguonda nu sun ne kino ne disco ne otra bar ragiundschibels sainz'auto, schi po uschè ün fögl mellan esser ter deprimand. L'auto nun es disponibel e la Viafier Retica... ähm, hej... x-in ün möd as stu eir darcho turner a chesa, e que na güsta già a las desch, u? Tiers tuot plouva que auncha. Super. E'ls 'ländlers', chi strasunan our dals amplifichadurs pendieus sü sur la porta (our in via!) per bainvgnir ils giasts, daun aunch'il rest. Impustüt perche cha's so cha dadains la porta es il stil da musica ün oter, e cha la glieud chi's rechatta da l'otra vart da la porta nu stu tadler quists 'ländlers'. E perche cha's so impü, cha precis quella glieud es la cuolpa cha svess as sto cò, da la fosa vart da la porta, da la vart dals 'ländlers' apunto. Cha's es dvanto bletsch intaunt mgniauncha da discuorrer. E chi es la cuolpa, chi es la cuolpa, scha's ho damaun la starvera e la tuoss? Chi? Quels chi's rechattan in quist mumaint precis lo, inua cha's füss svess, sch'els nu vessan piglio a fit be per se il local. Egoists! Els schi cha survainan lur drinkins e lur bierinas dal barkeeper. E svess as vezza be quist fögl mellan sülla porta, e plaunet as cumainza a vzair cotschen (ils 'ländlers' füssan già be sulets motiv avuonda...). A s'as sainta tradieu. 'Privatanlass': ridicul. Il pü gugent as organisess üna demo e's chaminess intuorn davaunt la bar cun qualche transparents, ma ouramai resta in realted be üna pussibilted: fer il puogn in giglioffa ed ir a chesa. Ed almain duos aspects positivs ho tuot l'istorgia: ils vstieus sun bainschi bletschs tres, ma almain nu spüzzane da füm fraid, e la buorsa nun ho piglio giò da pais. Her in sortida d'he inscuntro a Florentina, scoulara da gimnasi. Ella es steda la prüma persuna chi'd es steda pronta da'm respuonder ün pêr dumandas be per üna biera. Cu d'eira tia prüma vouta... in sortida managi. La prüma vouta ch'eau d'he sus-chieu ir in sortida d'eira, scu cha que es tradiziun, la saira da mia confirmaziun. Displaschaivelmaing nu d'eira que uschè il hit, perche ch'eau d'he gieu 39 feivra. Dunque, es que sto be üna cuorta e na fich speciela experienza. Ma cur ch'eau d'eir darcho sauna, suni ida quasi mincha fin d'eivna in sortida. Tü, chi est dimena üna persuna cun experienza sün quist champ: Perche as vo, seguond te, insomma in sortida? Düraunt quists ans d'he eau constato cha que do differents motivs per ir in sortida. Il motiv il pü simpel eir quel chi tuorna pel solit tar me es quel, cha's inscuntra glieud. Normelmaing vez eau be mieus collegs da scoula mincha di. Ils oters, chi lavuran, vezzi be minchataunt per cas u sch'eau fatsch giò cun els. (giova già tuotta temp cun sieu magöl da biera mez vöd). In sortida es uschigliö l'unic lö ch'eau poss inscuntrer els. Inscuntrer üna persuna in sortida es eir ün töch pü liber, a nun's vegn sfurzo da discuorrer tuotta saira be cun la listessa persuna, eir scha nu's so già lönch pü sur da che cha's pudess uschigliö auncha discuorrer. In sortida as po alura discuorrer cun ün e cun l'oter, uschè as imprenda a cugnuoscher üna pruna glieud. La granda part da la saira passainti alura tuottüna cun mieus meglders collegs. E che oters motivs do que auncha? Ün oter motiv per ir in sortida, es scha's voul fer festa. Pel solit as baiva alura ün poïn per dvanter pü luoch e per perder ün pô sias barrieras internas. Tar quist motiv capita que svelt cha's baiva ün pô da memma, saja que our d'accidaint u our da persvasiun. (exa sia biera). Tuot tenor quaunt da memma cha's ho alura bavieu u quaunt cha's cumporta po uschè üna saira dvanter ubain fich lungia u ch'ella po eir finir prontamaing e fich bod. Tar me persunelmaing dvainta uschè üna saira pel solit ün pô pü lungia ma que es eir già gnieu avaunt tar me ch'ella d'eira afin ün pô bger memma bod, cun que ch'eau vaiva bavieu uschè bger ch'eau staiva relativmaing mel. La fin d'üna tela saira nu stuvareg eau explicher... (posta üna biera) Ähm, na grazcha... Il terz motiv principel es scha's es in tschercha d'üna pitschn'aventüra... Na da l'aventüra da bütter sü, d'impersè d'avair ün pitschen flirt u da chatter l'amur da sia vita. (do ün cuc vi tar ün tip cun chavels s-chürs, suspüra e piglia ün grand süerf our dal magöl cha'l barkeeper ho stumplo no suravi la maisa da la bar). Eau, per exaimpel, nu sun uossa auncha mê ida in tschercha da l'amur da mia vita, uschè naïva nu suni. Scha's vo in sortida cun l'intenziun da chatter ün amih u ün'amia, as tuorna pel solit dischillus darcho a chesa. Scha's as metta be pitschens böts per üna saira nun's es zieva uschè dischillus, e chi so forsa as chatta listess ün nouv amih u amia. (do danouvmaing ün cuc illa direcziun surmanzuneda). A do eir da quels chi vaun in sortida cull'intenziun da na forsa imprender a cugnuoscher qualchün sün basa psichica, dimpersè be sün basa fisica: per üna not, il meglder in pusiziun orizontela. (svöda eir quista biera...) A do natürelmaing auncha bgers oters motivs perche cha's vo in sortida, quists trais sun seguond me insè ils principels. Ma suvenz as vo eir in sortida our d'ün masdügl da tuot ils motivs pussibels insembel. Minchataunt es ün motiv ün pô pü ferm, minchataunt ün oter. Aunch'üna dumanda: inua vest tü cun preferenza in sortida? I'l Dorta, a Zuoz! Grazcha cha t'hest piglieda il temp. (La prossma biera da Florentina vo sün mieu quint.)

10 FORSA IL PLI BI CAFÉ EN SURSELVA da Roger Nigg 1 Da dis da plievia mondel bugen a beiber café. Sche sundel a Glion, mondel egl Odeon: in pign local vis à vis il Maggi. Jeu, in nostalgicher da passiun, sesentel leu sco a Londra, sco en in auter temps: il temps dalla regina Victora ed il temps nua che Jack the Ripper fageva sterment alla glieud. El cumadeivel ambient selai semiar da temps vargai, sesan ins sin sessels dall'emprema classa da trens che vegnevan aunc tratgs da locomativas da vapur. Il café Odeon para nobels, ei denton enzatgei per mintgin, per giuven e vegl. Menaus vegn igl Odeon da Norma Bantli ed ella ei era quella che ha drizzau en cun carezia pil detagl quei local. Ed ei fa plascher ad ella e sias camerieras da luvrar cun anim in anim da survir si ils hosps en quei café, ed aschia vegnan ins survius cun pettas e tustgets fatgs dallas camariaras sezzas. Tgi che ha inaga la caschun da frequentar quei bi liug, ha la pusseivladad da beiber in té per l'olma, vegn a sesentir sco en sia atgna stiva egl Odeon, sco da casa en in temps gia passau. IN HAPPY END? sgnaffa plaina da Rafael Camenisch 2 L'Expo.02 è finida. Quai che resta èn sa chapescha ils daivets, insaquants possessurs da kiosks che vulan accusar la direcziun da l'expo.02, perquai che lur fatschenta n'è betg stada uschè buna sco previda e la savida ch'ils Svizzers na san betg, co lur patria vesa ora. Uschiglio n'avessan segir betg tants visitaders reclamà e tugnà che las exposiziuns na preschentian betg la Svizra. Havessian quels marmugns bain guardà meglier il mussà enstagl d'encurir dapertut cuntels da sac, baghetgs en furmas da chaschiels, Toblerones e Heidis! Pertge ina c- haussa è bain clara: La Svizra, che vegn preschentada a l'ester sco idilla cun ils motivs gist numnads, nun è la vaira Svizra. U contas persunas enconuschais vus che sunan la tiba? La verdad han ins pudì vesair en l'exposiziun "Happy End" a Bienna. Là è stà scrit nair sin cotschen: En tredesch minutas vegnan bavids 7'361 liters vin en Svizra. En il medem temp vegnan vendidas 6100 pirlas encunter mal il chau. Plinavant vegnan vendids en dudesch minutas 457 preservativs. Quellas cifras mussan fitg bain ch'ils Svizzers, anc sch'ins na dumbra betg quels che sa baivan sturns tut persuls, van en sortida e ch'els tschertgan instinctivamain insatgi per sa paregliar. In tec vin avess dal reminent era fatg bain als participonts da la discussiun da podium a Glion che ha tractà a chaschun dal "festival" la dumonda suenter in forum da cultura en l'emprima citad al Rain. Forsa n'avessan els alura betg discutà en in rudi e detg sulet chaussas che gia tuts savevan. Ed il dretg da tschappar tar la butteglia da vin avessan els en scadin cass gì, silmain sch'ins pren in exempel vi dal reschissur tudestg Wolfram Frank che tracta en il mument en trais tocs teatralics a Cuira l'antigonos (gr.: l'auter). En ina conferenza da pressa ha el lutgà encunter ina "Eventisierung" dals eveniments culturals. Detg cun auters pleds: sulet sias producziuns duajan esser vairs events. Il proxim di han ins vesì en la Bündner Woche ina fotografia dad el durant ina prova: Il Frank sin ina sutga, sper la sutga nundumbraivels stumbels da cigarettas ed ina butteglia da vin quasi vida. Ton pia tar ses event. Er in'autra chaussa en connex cun la verdad da "Happy End" è clera: Noss geniturs na ston betg esser surprais che las premias per las cassas da malsauns creschan. Sco nus savain è in motiv per l'auzament da las premias il grond dumber da medicaments che nus consumain. Ma tar tanta cultura cun tant vin nun è quai insatge auter che logic ch'ils Svizzers drovan dapli pirlas encunter il mal il chau, las qualas augmentan alura ils custs per la cassa da malsauns. 1 il Café Odeon ideal per nostalgichers tschertgan els la Heidi? 2 3 gievgia saira, ils 19 da december a las ha lieu la festa dal Chor Rumantsch el hotel Marsöl. da la partida è la band Tartaruga

11 GIEVGIA SEIRA, TGE SORTEIDA! da Corsin Caglia 3 Bunga sorteida, chella è greva da cattar. Aint igl rom d'ena studia dallas Punts am vaia declaro pront dad eir a tschartger la miglra sorteida durant l'emda a Coira. Chesta incarica vaia pruo d'execueir cun la pi gronda objectivitad pussebla. Glindesde seira, igl mies amprem de d'observaziun. Las ustareias digl martgea èn mecta veidas ed oter tgi en pêr sturns ainten la halla da biera vaia catto nigna gruppaziun cun ena tscherta "cultura" da sorteida. Marde seira sa preschainta la situaziun fitg sumigliainta. I am fatsch planget chittos. Tge duessa screiver aint igl pareri dalla mia studia? Bagn damai, ia va spero d'aveir mesemda daple cletg. E mancumal. La sorteida è mecta vivainta e legra. Ia va antupo ena gruppaziun tgi ò sa catto casualmaintg. Ia notesch: Mesemda seira, dètg bunga sorteida aint igl sidost digl martgea da Coira. Cò am dat en mat en cuffel e dei tg'ia stoptga neir dumang aint igl martgea vigl per veir propa ena bunga sorteida. Angraztgond ad el per chella infurmaziun sunga turno a tgesa. Ia va marveglias... Gievgia seira, anturn las otg. Ia spetg segl Plaz da Martegn. Cò sainta gio da gliunsch ena ramour indefinabla. Ia spetg. La ramour s'approximescha, adegna pi fitg. Ossa è'la angal anc davos igl cantung dalla tgesa. A me vo ena snavour giu pigl dies. Ia m'accorsch scu tgi en sentimaint da cletg surpeglia me. Ia pains: Oz è igl ties de! Oz è igl de dalla bunga sorteida. E veiramaintg, tottanegna stattan 40 dels avant me cantond e riond an egna. Ia sung perplex. Rabegl or nign pled! Ena matta am dumonda sch'ia viglia er neir cun els aint igl Capellerhof. Ia sung angal bung da dar digl tgea, cunchegl tgi la mia glianga trembla uscheia fitg. Siva d'en taimpet sunga bung da formular en'amprema dumonda e less saveir tgi tg'els seian. La matta am declera tg'els seian igl Chor Rumantsch, vegian ossa gist gia prova e sa cattan ossa sen veia alla canorta. Arrivos alla ustareia, sa tschaintan igls 40 dels ve dad ena meisa. I vign canto, givlo e rachinto sgnoccas. Naturalmaintg tgi er ena bunga gervosa ni en vegn delicious stattan sen meisa. I rigia ena taimpra famigliara ed ampernevla. Ia sung impressiuno ed impuno. Mademamaintg sunga er fitg surlivgia. Ia constatesch aint igl rapport final dalla studia: Gievgia seira, tge sorteida!

12 GIUVENS S-CHAFFISCHAN ÜNA NOUVA PAGINA RUMANTSCHA In sortida s'inscuntra üna pruna giuvens rumantschs. Chi chi'd es massa chastör per far la bella frisura e per s'allontanar massa dalöntsch da la stüva choda, quel ha uossa ün'alternativa cumadaivla per far cugnuschentschas: La nouva pagina dad internet rumantscha nun es be fatta da giuvens, ma eir creada in prüma lingia per giuvens. La 5avla classa gimnasiala da l'institut Otalpin Ftan ha lantschà quist proget per promouver e sustgnair nossa bella lingua rumantscha in ün chomp plü actual e plü modern. "No vain constatà cha la lingua rumantscha nun es fich derasada aint illa rait" am declera il manader dal proget, Janet Lehner: "Uschea es nada l'idea da crear ün'aigna pagina dad internet." Quista bun'idea han ils gimnasiasts ingaschats elavurà in scoula, ma il proget sco tal mainan els svessa in lur temp liber. Qua dess dir amo inchün cha la giuventüna dad hozindi saja chastöra! Ma, e che spordscha lura quista nouva pagina? "Nossa pagina es fatta per glieud rumantscha e per glieud chi s'interessa pel rumantsch. In prüma lingia cuntegna la pagina infuormaziuns e temas per giuvens e giuvnas", respuonda Janet a mia dumonda: "Suot as chatta differentas infuormaziuns sco novitats, evenimaints e documentaziuns davart nossa regiun, o eir davart persunalitats. Implü mettaina a disposiziun referats e cumponimaints "da scolars per scolars" sco "agüd da lezchas." Per augmantar quella sporta collavuran ils organisatuors cullas scoulas popularas da tuot la regiun, e la pagina vain actualisada mincha mais. STOP! Na schmetter da leger uossa be perquai cha la scoula vain tematisada! Üna homepage da giuvens as cunfuonda automaticamaing eir cul temp liber. Uschea daja sper criticas da films e preschentaziuns da cudeschs eir amo üna sparta umoristica ed i s'ha dafatta la pussibiltà da tadlar Radio Rumantsch ("Battaporta!"). Per gnir inavo pro las cugnuschentschas impromissas: aint il chat s'haja la pussibiltà da baderlar cun giuvens e giuvnas da tuot la rumantschia. L'idiom nun importa, l'essenzial es chi vain discurrü rumantsch online. Quai es bain üna bun'alternativa per muffels da sortida, nevaira?

13 VENDERDE SEIRA Hildegard versus Clotilda Nous vivagn ansemen ainten en'abitaziun. Mintgatant ans numnainsa cumaratas e mintgatant giainsa er ansemen an sorteida. Pertge tgi chegl è angal mintgatant? Ligie sez e vous, stimadas lectouras, stimos lectours, tgapirarossas! Clotilda: Venderde seira. Gl'è las e seis secundas. Hildegard è davent dad dus ouras an igl bogn e sa paregia per la sorteida. Ia sung gio da dei pronta, cura tg'ella vign or dalla sia tgombra, accumpagneda d'ena neivla da parfum. Ma basta, ia na less betg perder pled surdlonder, pertge tgi nous ischan gio tard vedlonder e vous stimadas lectouras e stimos lectours, savez az metter avant tge tgi capitess, sch'ia crititgess igl sies pareir. Exact, anc en'oura spitgier! Uscheia rasponda sen las sias dumondas: "Oh, tge bela tgi te ist! Ea, te ast do se bagn igl belet. Na, ins vei betg tgi te ist eida cugl cajal dasperas ve. Tot è perfect. Lainsa eir?" E schwups, nous ischan finalmaintg an la bar stgeira, noua tgi blera gliout consumescha drinks, tgi fon neir leghers. Hildegard na dovra betg ena minuta per cattar la sia amprema victima. Gl'è en omet cun nas crutsch, tgavels curts ed ena rentga an l'ureglia dretga navot da bel! Ma la mia conabitanta sa patta a dies a chest poveret ed igl smardatga prest cun la sia cascada da pleds. Ia ma tschaint dantant ve dalla bar e pegl se contact cun en giuvenot. Ma cun en îgl observa igl Robbie-Williams-malgartagea e la mia conabitanta, tgi pitescha dalla malsogna tschatscharlousa, cunzont schi ella ò bavia dus drinks cun aint sirup tgi fò neir legher. Chel pover toc na vign betg eneda a pled. Hildegard è an igl sies elemaint e raschunga e chinta e raschunga e oh, igl clon da Frankenstein è sa durmanto!!!! Ma Hildegard na s'accorscha betg chest incap e rachinta anavant. Ia ma decid da gidar a chest schani e ma tschaint dasper igl sprachror dalla bar. Ella sa catta disturbada antras la mia preschientscha ed am fò segn da lippar. Ella gesticulescha an tala veisa, tg'igl sies drink cupetga ed igl liquid tatgond corra directamaintg sen las tgotschas digl om durmont. Ma bagn ast fatg Hildegard, uscheia survignst er mai en omet! Igl om sa desda antras chella duscha ed antscheva a deir se malaverva. Chegl fò el scu tgi Hildegard fò, sch'ia ambleid da pigleir davent la clav digl isch ed ella na pò perveia da chegl betg an l'abitaziun. Mamma mia! Ed igl mender ve dall'antiera tgossa: la mia betg schi tgera conabitanta dat a me la colpa, perchegl tg'ia sung neida nò tar chest beeeeellll exemplar d'en om ed antras chel incap vegia ella ossa nignas schanzas tar chel e tot angal perveia da me! Ia sung eida or da chesta bar e va angiro dad eir igls proxims venderdes suletta an sorteida, laschond ruschanar Miss Hildegard ve dallas pareis! Hildegard: Venderde seira, igls XX da X, XXXX. Las conabitantas C e H von sen l'iniziativa da H an sorteida. H era numnadamaintg da l'ideia tgi sia conabitanta C vegia dad antrar pi savens an contact social. Detg e fatg! Chella seira lò ègl er alla conabitanta C, ena amatoura da dretg ed urden, digl tottafatg tuttegna tgi l'abitaziun communabla è an en terribel disurden: vistgadeira starneida pigl palantschia anturn, utensilias da bellet anve e favogns, petgens, glouas e lac da tgavels annò... scu mintga creatura feminina vottan er C ed H far vigour an sorteida!!! Dus ouras pi tard aintran las dus conabitantas ainten igl local preferia da conabitanta H. Per tgappar en zichel curasch ordinescha conabitanta C ena bavronda cun aint en zichel, ma propa angal ein zichelign alcohol. Dantant ò conabitanta H spio ainten la fola ena persunga masculina, cò numnada persunga A. H antscheva cun A en discurs veiramaintg animo. L'acziun suondonta da C na so conabitanta H anc oz betg sa declarar. Ò la bavronda alcoholica gia en effect mengia ferm sen C u n'ò ella simplamaintg betg pudia cueir a H en discurs cun ena bela persunga masculina? An mintga cass corra conabitanta C scu ena mesa furia tras igl local, s'unescha a H ed A, tgi èn pero talmaintg fatschantos ainten igl discurs tg'els na fon betg grond stem da C. Nign dubi, chegl è sto mengia bler per C!! Or da muteivs inexplitgabels sveida ella simplamaintg la sia bavronda sen las tgotschas da persunga A!!!!! Quant penibel per C, ma anc pi penibel per H e betg dad amblidar igl pover schani A! Ma cun chegl è l'antiera istorgia betg anc fittada, na, conabitanta C ò er anc da disturbar igl sagond discurs da conabitanta H cun persunga B, mademamaintg masculina (persunga A era numnadamaintg sa ratratga sen tualetta per pruar da lavar or igl tatg sen las tgotschas). Cura tgi persunga B turna dalla bar, noua tgi ella veva ordino dus bavrondas, naturalmaintg per ella sez e H, tigna conabitanta C simplamaintg or la tgomma tgi la povra persunga B croda cun bavrondas e tot per tera. Las conabitantas bandungan sen chegl immediatamaintg igl local. Tgeras lectouras, tgers lectours dallas Punts, ia, Hildegard, sung oz ansomma betg ple digl meini, tgi Clotilda vess dad antrar en po daple an contact social! Ia digl reminent na vign mai ple cun ella an sorteida, scurrentar e spavantar las creaturas masculinas saia er mezza!!!

14 MADONNA DIE ANOTHER DAY da David Spinnler LANTANA IL FILM DAL MAIS da Curdin Fliri CONTAINER Finalmain! I dat puspè in James Bond! E lura gia la dischillusiun: La chanzun da titel è ina catastrofa! Era sche Madonna la chanta. Die Another Day è en noss kinos ils Pierce Brosnan è il 007 Halle Berry è il Bond Girl tge vul ins dapli? Ma sco emprim stuvain nus ussa tadlar gia dapì in temp questa chanzun malfatta. Madonna ha vulì far insatge auter. Denteren lascha ella perfin splatschar ils mauns ad in pêr collegas uschia tuna quai en mintga cas. E lura quella vusch da staccato cun in pau effects tecnoids. Igl è in schaiss! Dentant fans da James Bond si cullas ureglias e dai: sut naginas cundiziuns na dastga mancar ina unica single cun ina chanzun titel dad in James Bond en la collecziun privata. Basta: laschain chanterlar a Madonna il film vegn segir ad esser in highlight. Da la lavur dal reschissur Lee Tamahori dastg'ins avair mirveglias Pierce Brosnan è in Bond cumprovà e lura vegn anc il highlight: Halle Berry che ha a chasa il Oscar per sia rolla en il film Monster's Ball Halle Berry è il Bond Girl. Cun tut quellas perlas supportins era anc questa chanzunetta irrelevanta da Madonna. Single: Madonna 'Die another day' Warner wbr.com la schibetta dal mais proponida dal Battaporta dal Radio Rumantsch Ina dunna svanischa. Quatter nozzas vegnan intretschadas en ina rait d'amur, engion, sex e mort. Tuts na vegnan betg a surviver. LANTANA è in drama psicologic che sa confunda cun ils temas amur, infidelitad e disfidanza. I sa tracta dals sbagls che nus faschain, da las consequenzas che nus patin e da la fadia che nus dain per empruvar da meglierar chaussas. Il policist Leon (Anthony La Paglia) survegn l'incumbensa da retschertgar la scumparsa misteriusa d'ina autura renumnada (Barbara Hershey). Sper sia lavur al turmenta er anc sia infidelitad envers sia dunna (Kerry Amstrong) la conscienza. Cun scuvrir toc per toc il cas da l'autura vesa el adina pli profund en las relaziuns dals pèrins enturn el che n'èn betg uschè perfettas sco pretendidas. Mintgin e mintgina ha insatge da zuppantar, vegn suspectà, è culpabel. Ils secrets e las manzegnas sa cruschan cun las retschertgas da Leon ed al mussan ina via or da si atgna crisa. La tschertga da la vardad e da sia fortuna persunala è plain misteris misteris uschè spess e spinus sco la bostgaglia da lantana. La bostgalia da lantana vegn avant in Australia. Da là vegn er quest film. LANTANA è fatg dal producent Jan Chapman (The Piano) ed è vegnì scrit da l'autur Andrei Bovell tenor il cudesch "Speaking in Tongues". La reschia ha manà Ray Lawrence. Il film ha gia gudagnà 7 Oscars australians. Tar nus è quest film en ils kinos davent dals 14 da november. 7 da december, Cool e Sexy Sta.Maria ina giada rockischem Questa stad eran ils Bulais e Tartaruga sin turnea a travers il Grischun. Cool e Sexy sa numnava quai. Il grond finale da lour turnea è ils 7 da december a Sta. Maria en Val Müstair. Er da la partida èn ils Diabolics. L'entrada custa 15 frs. e las portas da la sala polivalenta arvan a las h. Vuls er Ti publicar Tia famiglia? Per il puntissimo "famiglia" èn tut ils/las redactur/as e surtut ils/las lectur/as envidads da trametter fotografias da famiglia a las layoutistas da Punts. Quai pon esser fotografias dal davos tschientaner, fotografias da la davosa festa da famiglia ubain pictures fatgs cun la polaroid. Las fotografias survegnis sa chapescha enavos. Trametter ellas fin ils 10 da november: Theres Jörger, Pfingstweidstrasse 31b, 8005 Turitg

15 ENGIAVIENEIRA DAL MAIS dal team da Punts Ti fas mintga fin d'emna il gir obligatoric en las bars? Ti es in expert/a per tut ils drinks ch'èn gist "in"? Ti sas adina nua che passa la pli gronda party? Alura è questa tia engiavinera! Nà cul rispli e cun las experientschas! 1. Guarda per la musica 2. "Sortida" en englais 3. Bal da la Caribica 4. Drink da cult Sidamerican 5. "Sortida" per fans da film 6. Lieu tradiziunal cun maisa radunda 7. Fan tuts fitg gugent 8. Ritem dals onns La droga da Bob Marley Trametta la soluziun a: Fadrina Hofmann, Rue Louis-Chollet 3, 1700 Fribourg Blera fortuna!

16 AZB 7130 Glion VE COMMEMBER DA LA GIURU IMPRESSUM ABUNESCHA PUNTS ( ) Jau abunesch PUNTS la gasetta giuvna per mo 40 francs ad onn ( ) Jau regal in abunament da PUNTS la gasetta giuvna num e prenum: adressa: lieu: Trametta il talun a noss secretariat: PUNTS, Curdin Fliri, Avant Muglins, 7550 Scuol, punts@rumantsch.ch, u La GiuRu sustegna Tai a finanziar, communitgar e realisar Tes project rumantsch e giuvenil. Ti survegnas sco commember/bra da la GiuRu regularmain infurmaziuns dals projects actuals e la pussaivladad da Ta partecipar ad inscunters internaziunals ed ad autras activitads. Jau vuless daventar commember/bra da la GiuRu: ( ) Jau vuless las infurmaziuns per e mail e na paj uschia betg la contribuziun da 10 francs ( ) Jau vuless las infurmaziuns per posta e paj en 10 francs sin il conto: GKB GiuRu num e prenum: adressa: lieu: tel: Trametta il talun a la suandanta adressa: GiuRu, Chascha postala, 7000 Cuira, u T'annunzia sut chauredactur/a: Fadrina Hofmann, Rue Louis-Chollet 3, 1700 Fribourg fadimari@yahoo.com, Rafael Müller, Rue de l'industrie 2, 1700 Fribourg, rafaello@gmx.ch, caporedactur/a: Rafael Camenisch, Poststrasse 24, 7000 Cuira, rafaelcamenisch@bluewin.ch, Valentina Camous, Engadinstrasse 38, 7000 Cuira camous@hotmail.com Pia Valär, Ritscha, 7524 Zuoz pvalaer@hotmail.com redactur/as en quest numer: Clotilda e Hildegard / Corsin Caglia / Andri Derungs / Curdin Fliri / Elena Filli / Sofia Galotti / Roger Nigg / Pierluigi, Umberto, Gioacchino e Girolamo / David Spinnler layout: Theres Jörger, Pfingstweidstrasse 31b, 8005 Turitg, theres.joerger@bluewin.ch Lydia Wilhelm, Sternmattstrasse 57, 6005 Lucerna, lwilhelm@blu .ch secretariat: Punts, Curdin Fliri, Avant Muglins, 7550 Scuol, punts@rumantsch.ch, u stampa: Spescha&Grünenfelder, Glion pretsch d'abunament: 40 francs ad onn, Raiffeisen Laax editura: GiuRu, Chascha postala 312, 7002 Cuira internet: Punts è commembra da l'associaziun da la Pressa Svizra dals Giuvens