PROTESI DAL OMBUL. Pas dopo pas insiemi a voaltris

Transcript

1 PROTESI DAL OMBUL Pas dopo pas insiemi a voaltris

2 AZIENDE pe ASSISTENCE SANITARIE N. 3 Friûl de Alte Culinâr di Mieç Presidi Ospedalîr di Sant Denêl DIPARTIMENT CHIRURGJIC SOC Ortopedie e Traumatologjie PRENOTAZION VISITIS SEGRETARIE orsd@aas3.sanita.fvg.it ATIVITÂT CHIRURGJICHE Il grup medic de Struture Operative Complesse di Ortopedie e Traumatologjie e je componude di 10 miedis: Andrea Covolato (Diretôr) Jacopo Bonica Gianpiero Palomes Antonio Schiavi Maurizio Cum Andrea Bortolussi Pier Paolo Montina Rosa Boz Amalia Miani Mariaelena Della Vedova Contignûts SOC Ortopedie e traumatologjie SD Imagjins Archivi AAS3 - Pixabay Grafiche Elena Sabra Offoiach Martina Picco Traduzion par furlan Linda Picco, Sportel pe lenghe furlane de AAS3 Stampe Rosso Grafica SO Relazioni, comunicazioni e fund raising

3 S.O.C. ORTOPEDIE E TRAUMATOLOGJIE SD La S.O.C di Ortopedie e dispon di un nucli chirurgjic dotât di dôs salis operatoriis di dimensions ecuivalentis. La ativitât chirurgjiche si articole su 7-8 sentadis operatoriis par setemane. La programazion dai intervents e ven fate su la base dal ordin di inseriment te liste di spiete, tignint cont dai spazis cjapâts de chirurgjie traumatologjiche, che no je programabile. Organizazion Degjencis Lis degjencis ortopedichis a previodin doi regjims di ricovar: 1. La degjence curte/diurne (DAY-HOSPITAL) pe grande part de patologjie ortopediche chirurgjiche di elezion, gjavant la chirurgjie protesiche; 2. La DEGJENCE ORDENARIE, dulà che a son tratadis lis patologjiis traumatichis e la chirurgjie protesiche. A supuart de ativitât di degjence al è istituît il servizi di PRE OSPEDALIZAZION, che al permet di fâ in maniere preventive ducj i aciertaments necessaris pal tratament chirurgjic, ridusint i timps di ricovar. Degjence ortopediche ordenarie Lis patologjiis tratadis in maniere plui comune a son rapresentadis di: 1. Traumatologjie dai articui superiôrs e inferiôrs, bacin e colone vertebrâl; 2. Chirurgjie protesiche par patologjiis degjenerativis e traumatichis de spale, dal ombul e dal zenoli, cun tecnichis mini invasivis; 3. Chirurgjie artroscopiche de spale (sindrome di conflit, roture di scufe, instabilitât, e v.i.), dal comedon, dal pols, dal zenoli (ricostruzion dal leament crosât, iper pression de cocule dal zenoli, e v.i.), de cjavile e dal ombul. Degjence curte (Day-Hospital) La degjence curte e je un model di organizazion sanitarie che e permet di fâ trataments ortopedics di gjenar chirurgjic cun degjence in ospedâl limitade aes oris diurnis. E je une oportunitât pal pazient nassude in graciis dal disvilup di tecnichis sanitariis modernis e dal implei di procediments che a consintin al pazient di tornâ al propri domicili une vore in curt dopo il tratament. La difusion cressinte di chest model assistenziâl e derive dai vantaçs gjestionâi e dal gradiment esprès dai pazients che a àn doprade cheste formule di tratament. Lis struturis ospedalieris di degjence, lis salis operatoriis e i struments tecnics doprâts par chestis prestazions a son i stes che si implein par dutis chês altris ativitâts fatis inte S.O.C. Ativitât ambulatoriâl L'Ambulatori Divisionâl al è articolât daûr des diviersis tipologjiis di pazients che a acedin a chest servizi. Al cjape dentri: visitis ordenariis di ortopedie gjenerâl prenotadis dal Centri Unic di Prenotazion (CUP); visitis di Pront Socors Ortopedic; visitis di control sucessivis al ricovar, prenotadis in maniere direte dal miedi de S.O.C. al at de dimission ospedaliere; visitis di control sucessivis a une prestazion ambulatoriâl, ancje chestis domandadis in maniere direte dai miedis de S.O.C. fin ae fin dal tratament. L'Ambulatori libar professionâl al ven gjestît in maniere personâl di ogni professionist.

4 Informazions gjenerâls sul ombul LA ANATOMIE DE ARTICOLAZION DAL OMBUL La articolazion dal ombul e coleghe il tronc cui articui inferiôrs e e garantìs, midiant de sô forme sferiche, une libertât enorme di moviment. E je costituide di une cavitât (acetabul) presint intal bacin (vues pelvic) e di un cjâf emisferic presint inte part superiôr dal femur, ducj i doi rivistîts di un strât di cartilagjin. La articolazion e je dal dut fate sù di une capsule articolâr, che al so interni un strât di mucose al prodûs il licuit sinoviâl che, di une bande, al nudrìs la cartilagjin e, di chê altre, al garantìs un scoriment cence atrît. Il licuit sinoviâl, associât ae cartilagjin, al à ancje une funzion di amortizazion, stant che al intercete lis fuarcis di intensitât impuartante che a interessin la articolazion dilunc de vite di un individui.i leaments che a coleghin i vues a stabilizin la articolazion, intant che il moviment de stesse i spiete ai muscui. PATOLOGJIE DAL OMBUL Lis causis ae origjin di une patologjie de articolazion dal ombul a puedin jessi molteplicis; chê plui comune e je il consum anomal dal strât cartilagjini, la artrosi. In ambient medic il tiermin doprât pe artrosi dal ombul al è coxartrosi. Cheste patologjie si diferenzie in artrosi primarie (idiopatiche), chê la sô eziologjie e je ore presint dal dut discognossude, e artrosi secondarie, che si presente tant che consecuence di une patologjie di base cognossude (tant che, par esempli, reumatics o disordins circolârs di origjin metaboliche). Lis deformitâts de articolazion dal ombul, congjenitis o che a risultin di fatôrs predisponents, e ancje i traumis, a rapresentin altris causis che a butin in lesions a dam des struturis ossiis o di elements articolârs. Il pazient al è dal dut cussient dai sintoms di cheste patologjie, ven a stâi dai dolôrs che al sint intant che al cjamine, di une riduzion progressive de distance percoribile in assence di dolôrs, fin a rivâ a une cundizion là che nol sint cuasi plui nissun solêf, nancje cuant che al polse. A dut chest e va zontade une riduzion nete de mobilitât gjenerâl de articolazion dal ombul. Lis alterazions de articolazion artrosiche leadis ae malatie a son ricognossibilis cun facilitât intune radiografie par vie dal sutiliament o de assence totâl dal spazi intra articolâr. Intal ombul san, invezit, la cavitât articolâr e je ben palese e uniforme. Dopo vê esaurîts ducj i tentatîfs di tratament no invasîf (fisioterapie, calminis, bagns e farmacs analgjesics o antinflamatoris), l'implant di une articolazion artificiâl dal ombul, clamade ancje protesi totâl di ombul, al ufrìs in gjenar la pussibilitât di eliminâ il dolôr e di restaurâ la mobilitât. Cartilagjin articolâr fruiade Cul timp il procès normâl di invecjament al pues causâ fressurazions o fenomens di fruie a nivel cartilagjini. Cuant che si verifichin chestis cundizions, i vues che a costituissin la articolazion a sfrein un cuintri chel altri. Cuant che il cjâf sferic dal femur al jentre in contat diret cul acetabul, la articolazion si indurìs e e dûl. Frature dal cuel dal femur Une brut colade o un colp violent tal ombul a puedin rompi (fraturâ) il vues de cuesse, in gjenar inte regjon dal cuel femorâl. Se il vues fraturât nol vuarìs in mût coret, la articolazion e pues a planc fruiâsi. Il flus di sanc intal cjâf dal femur al podarès risultâ limitât o fintremai fermât e provocâ duncje la necrosi de stesse articolazion. Ombul displasic La displasie congjenite dal ombul e je dal grup des malformazions gjenetichis. La articolazion e je instabile di un pont di viste mecanic e chest al puarte a un invuessament difetôs (displasie) e al prejudiche il disvilup dal tet acetabolâr. Chest ultin no si forme in maniere corete, si sbasse e, di solit, al à une angolazion esagjerade che e cause problemis ripetûts di lussazion (dislocazion)

5 CE ISE UNE PROTESI TOTÂL DI OMBUL? La protesi totâl di ombul (o PTA par talian) e je la sostituzion de articolazion malade cuntun implant artificiâl. La protesizazion di une articolazion che e à patide une lesion e rapresente un dai sucès principâi tal cjamp ortopedic. Tancj decenis indaûr, la struture avonde semplice de articolazion dal ombul - une articolazion di gjenar sferic - e à indusût miedis e tecnics che a operin tal cjamp medic a creâ une copie artificiâl che, intal timp, in graciis dai controi di follow-up e dai progrès intes metodichis e intai materiâi chirurgjics, e à fat grancj pas indenant fin a rivâ ae otimizazion de protesi totâl dal ombul. In Europe si fasin plui di implants l'an e intai Stâts Unîts plui o mancul , duncje la PTA e pues jessi contade tra i intervents di routine. La protesi dal ombul, progjetade par simulâ la anatomie umane, e je formade di un cotîl (cul so insert), di une gjambe femorâl e di un cjâf sferic che al ven aplicât su chê stesse gjambe femorâl e che si môf dentri dal cotîl. Lis componentis protesichis che a jentrin in contat diret tra di lôr a previodin un cjâf di ceramiche o di metal che si articole cuntun insert in polietilen, in metal o in ceramiche. La lôr funzion e je chê di slizerî il dolôr, restaurant la funzionalitât de articolazion, e di resisti cetant plui pussibil intal timp. CUANT COVENTIAL SOMETISI A UN INTERVENT? La protesizazion totâl di ombul e je un intervent praticât cun sucès di plui o mancul 40 agns che al continue a racuei risultâts simpri miôr midiant de ricercje e de tecnologjie dai nestris dîs. Dutis lis articolazions mobilis dal cuarp, tant che l ombul, il zenoli e la spale, a son rivistidis di doi strâts di cartilagjin articolâr, separâts di un strât di licuit cetant sutîl. Chescj doi strâts di cartilagjin articolâr a son slis, traslucits e corints par consintî ae articolazion di movisi cun grande facilitât. In cierts procès patologjics, e fra chei la artrosi e la artrite reumatoide, la superficie de articolazion si deforme e e devente ruspie, procurant dolôr e limitant il moviment articolâr. Al prin comparî dai sintoms, il tratament al pues consisti propit inte assunzion di anti inflamatoris, o, intal ûs di une baguline. In ogni câs, cuant che il dolôr e la limitazion funzionâl dal ombul a cressin, misuris di chest gjenar no saran plui in stât di slizerî il dolôr in mût sodisfasint. In chest câs, si varà di cjapâ in esam la pussibilitât di un intervent di protesizazion dal ombul. Dut câs, tant che par ducj i grancj intervents, a son simpri pussibilis eventuâls complicazions e i pazients, prime di sometisi al intervent, a varessin di jessi ben cussients dai pericui che chel al compuarte. LA SOSTITUZION DAL OMBUL L ombul e je une articolazion di gjenar sferic sempliç che e coleghe il femur cul bacin. Cuant che chestis superficiis articolârs si alterin e a deventin ruspiis, causant dolôrs fuarts e rigjiditât grave, al covente cambiât il cjâf dal femur e l acetabul. La protesi totâl di ombul e previôt che un cotîl al vegni metût intal bacin e duncje fissât inte sô sede (acetabul), e cun di plui che une gjambe di femur, che ae sô estremitât superiôr al è fissât un cjâf, e vegni metude intal canâl femorâl. Il cjâf e l acetabul (cotîl) artificiâi duncje a vegnin colegâts tra di lôr par fâ la funzion di une normâl articolazion di ombul. Par ogni gjenar di protesi e je previodude une grande sielte di modei realizâts in taiis diviersis. La sielte dal gjenar di protesi e je detade des cundizions dal vues, dal pês e de ativitât fisiche dal pazient. Prime dal intervent e ven fate, su la fonde dai risultâts dai esams clinics e di une radiografie particolâr, la planificazion preoperatorie par determinâ il model, la taie, la posizion dai components protesics e il metodi di fissazion. In cheste fase al è in gjenerâl ancje pussibil previodi i justaments di lungjece dai articui par eliminâ eventuâls diferencis. Dut câs, in fase intraoperatorie il chirurc si risiervarà la pussibilitât di meti un model diviers di chel planificât in principi.

6 DI CE SONO FATIS LIS PROTESIS ARTICOLÂRS PAL OMBUL? I materiâi impleâts pes protesis articolârs a son di nivel tecnologjic alt, a garantissin une compatibilitât estreme e une tolerabilitât a lunc tiermin de bande dal cuarp uman, proprietâts che a son definidis tant che biocompatibilitât dal materiâl. In gjenerâl a esistin trê diviers gjenars di materiâl doprâts par finalitâts ortopedichis: metai, polimars e ceramichis. I implants a vegnin sometûts a cjamis une vore altis dentri dal cuarp e, di consecuence, a àn di vê la resistence tipiche dai materiâi avanzâts di un pont di viste tecnologjic, in stât di sostignî ducj i ciclis di cjame che chei a vegnin sometûts dilunc dai tancj agns dal lôr ûs. Lis gjambis par ombul a son prontadis a cjalt par dâur la resistence necessarie. In prin, ducj i metai a vignivin fondûts, vuê invezit la tecniche di fabricazion a cjalt si è afermade tant che il procès in stât di furnî i risultâts miôr, sedi di un pont di viste metalurgjic che fisic. Vuê i chirurcs ortopedics di norme a doprin une tra chestis trê versions: Protesi cimentade Il cotîl e la gjambe femorâl a vegnin fissâts al acetabul e al femur midiant di une resine di prese svelte, chel che i disin ciment ossi. Protesi no cimentade La gjambe femorâl e il cotîl a vegnin inserîts a pression o invidâts. Lis componentis si ancorin in maniere stabile e svelte midiant di chê che i disin fissazion biologjiche, che si base su la neoformazion di tiessût ossi su la superficie de protesi. Protesi ibride Il cotîl al ven fissât cence ciment, intant che la gjambe de protesi e ven cimentade intal vues.

7 CEMÛT PREPARÂ LA PROPRIE DEGJENCE TAL OSPEDÂL Pe degjence ospedaliere e covente preparade une piçule valîs che e varà di contignî cjalçaduris antisbrissade (par esempli scarpis di tenis) e induments pratics. Si consee di puartâ ancje lis croçulis dopradis in precedence pe deambulazion, che a coventaran intant de terapie ocupazionâl. Dilunc de degjence ospedaliere il pazient e la sô famee a discutaran cul personâl lis sieltis pussibilis di tratament post ospedalîr, che a podaran cjapâ dentri ancje servizis di terapie a domicili. I servizis di terapie domiciliâr a puedin ufrî tantis oportunitâts a cjase proprie, e tra chês la assistence infermieristiche, la fisioterapie, la terapie ocupazionâl, i servizis sociâi e la assistence sanitarie domiciliâr. CEMÛT PREPARÂ LA PROPRIE DEGJENCE A CJASE Par facilitâ il tornâ a cjase, a son tantis lis robis di fâ prime di sometisi al intervent: Preparâ in anticip mangjative di conservâ in piçui contignidôrs, di scjaldâ cuant che al covente. Meti pignatis, padielis e plats che si doprin plui dispès suntun plan di lavôr o suntun mobil plui alt. Intes primis setemanis dopo dal intervent nol sarà, di fat, pussibil pleâsi. Par no sbrissâ, eliminâ cualsisedi tapedut sul paviment. Misurâ la altece dal jet e riferî cheste informazion al propri terapist. Al podarès coventâ che si zonti un piçul materàs se il jet nol è ae altece corete. In chest mût al sarà plui sempliç montâ sù e dismontâ dal jet.

8 L INTERVENT Intervent cun tecniche mini invasive E je une tecniche cetant consolidade intal nestri ospedâl, che cun chê si fâs l'implant di dutis lis artroprotesis di ombul. Cheste e previôt une incision de piel di plui o mancul 6-8 cm, cun risultâts otims sedi funzionâls che estetics. Dopo vê fate la incision, si espon la articolazion dal ombul. Il cjâf femorâl prejudicât al ven taiât e gjavât vie. La separazion dal acetabul e ven fate fresant a grât a grât chel stes acetabul fin che si oten un canâl che si adati dal dut ae forme e ae misure dal cotîl. Il cotîl al ven metût intal acetabul fresât in precedence e duncje fissât cun vîts, ciment ossi o a incjastri (press-fit). Ancje il femur al ven preparât cun struments adats par dopo procedi al implant de gjambe femorâl. Dopo vê implantade la gjambe femorâl intal femur, si procêt ae fissazion dal cjâf. Cumò la gjambe, cul cjâf femorâl, e ven fissade al cotîl. La ricostruzion dal obul e je complete.

9 DOPO DAL INTERVENT Al tiermin dal intervent, il pazient al ven trasferît inte cjamare dal repart dulà che i infermîrs si interessaran di monitorâ cun atenzion lis sôs cundizions. Al è naturâl che inte regjon dal ombul si puedi sintî un dolôr lizêr. Il tratament dal dolôr al tache intant dal intervent e al va indevant par dut il periodi di recupar, daûr di chel che al è stât discutût cul anestesist e cul grup infermieristic prime dal intervent. LA DEGJENCE TAL OSPEDÂL Par solit, tes 48 oris dopo dal intervent il pazient al sintarà dolôr. Cun di plui, la gjambe e vignarà imobilizade sedi par evitâ il discuinç de articolazion che par fâ calâ il dolôr. Par ridusi il pericul di trombosi a vegnin dopradis bendis elastichis o cjalcis compressivis. I esercizis pal cuarp e la restaurazion de tonicitât muscolâr a tachin su la base dai obietîfs prefissâts dal chirurc e dal fisioterapist. Al vignarà studiât un program di riabilitazion personalizât, in mût di consintî al pazient di cjapâ sigurece intai moviments, un pas daûr chel altri. Prin di dut al impararà a jevâ dal jet. Il fisioterapist al judarà il pazient a sentâsi, a stâ sentât in posizion corete e a alçâsi. Si varà di evitâ di zirâ bande l'esterni la gjambe operade e di incrosâ lis gjambis, e si varà di lâ daûr des istruzions dal fisioterapist. Ogni dì il pazient si esercitarà a cjaminâ doprant lis croçulis. L'obietîf al è chel di alenâ i muscui femorâi e pelvics dal pazient in mût di otignî il vantaç massim de mobilitât tornade a cuistâ. La tonicitât muscolâr e sarà recuperade di gnûf midiant di esercizis fisioterapics cuotidians. Tantis gnovis piçulis precauzions a judaran il pazient a tornâ a cuistâ la plene autonomie. Tant plui ative e sarà la partecipazion dal pazient, tant plui svelt al rivarà a otignî i siei obietîfs. Al è di impuartance fondamentâl lâ indenant ancje a cjase cui esercizis di riabilitazion. TORNÂ A CJASE Tornant dal ospedâl, in curt il pazient al rivarà a tornâ aes sôs ativitâts professionâls e privadis, fasint atenzion in ogni câs a no sfuarçâ masse la libertât di moviment tornade a cuistâ e dedicantsi a ativitâts sportivis lizeris, tant che la biciclete, il schi di fonts, il nadâ e lis cjaminadis. Lis ativitâts fatis a determinin lis cjamis che e je sometude la articolazion artificiâl e che duncje a influencin la sô durade. Di consecuence, par une articolazion artificiâl nol è pussibil furnî une garanzie funzionâl ilimitade. Intal câs che il pazient al sinti dolôrs e/o disturps ae articolazion, al sarà ben che al ledi li dal so miedi par une visite specialistiche. In ogni câs, ancje se no si àn disturps, si consee di sometisi ogni an a visitis di control; di fat, midiant de esperience acuiside, il miedi al è in stât di ricognossi, a un stadi precoç, eventuâls complicazions che a podaressin manifestâsi dome dopo tancj agns.

10 Program di stâi daûr a cjase Il pazient al pues spietâsi di tornâ a cuistâ l'ûs totâl dal articul operât in timps curts ma, almancul pal prin periodi dopo l'intervent, lis robis a saran diviersis. La gnove articolazion dal ombul e sarà di fat in part no protete fin che i muscui no sarant in stât di tignîle al ripâr di moviments involontaris e no corets che a podaressin provocâ il scolament o fintremai il discuinç. Une liste di 15 ponts e pues someâ ecessive, ma il presit di paiâ par visâsi e rispietâju e je robe di pôc, se l'obietîf al è chel di otignî un risultât che dome cualchi deceni indaûr al jere calcolât impensabil. 1. ÛS DES CROÇULIS Cuant che si doprin lis croçulis, visâsi di tignî la gjambe drete o a pene zirade bande l'esterni. Si varès di jessi in stât di stâ in posizion drete pleant un pôc i comedons. Cjariâ su la gjambe operade il stes pês di cuant che si jere tal ospedâl. Cuant che si è fers, lis croçulis a varessin di jessi disponudis in maniere laterâl, a pene un pôc plui indevant de ponte dai pîts. Cuant che si alce il pît o si lu slungje di là des croçulis, poiâsi aes mantiis di pueste. Sigurâsi di cjariâ il pês su lis mans e no su lis lesinis. Atenzion: no provâ di bessôi se no si à la aprovazion dal propri fisioterapist. 2. LÂ SÙ PES SCJALIS CU LIS CROÇULIS Poiâ la gjambe no operade sul prin scjalin. Fasint fuarce su la gjambe sane e su lis mans, puartâ chê altre gjambe sul stes scjalin. Movi lis croçulis. Lâ indevant in chest mût fin cuant che no si rive insom. Se la scjale e je dotade di pareman, tignî dutis dôs lis croçulis dome intune man e cun chê altre poiâsi al pareman. 3. LÂ JÙ PES SCJALIS Poiâ lis croçulis sul prin scjalin. Poiâ la gjambe operade sul stes scjalin. Poiâ dut il pês pussibil su lis croçulis. Movi ancje la gjambe no operade sul stes scjalin. Ripeti chestis fasis fin cuant che no si rive al pat inferiôr. 4. CEMÛT SENTÂSI Doprâ une cjadree sigure e robuste cui braçâi. Doprâ un cussin par alçâ la altece de cjadree in mût che i flancs si cjatin plui adalt dai zenoi. Par sentâsi, lâ indaûr viers la cjadree, fin a tocjâle cul daûr dai zenoi. Cjapâ dutis dôs lis croçulis cu la stesse man, de bande no operade. Slungjâ la gjambe operade poiantsi al braçâl e sentantsi a planc, simpri tignint la gjambe operade indenant. Cuant che si è sentâts, tignî l ombul intune inclinazion no superiôr ai 70 grâts. Se si pleisi indenant o si slungjisi par cjapâ i ogjets, tant che par esempli il telefon, la inclinazion e cres. Par jevâ sù, cirî di alçâsi mantignint l ombul inclinât di 70 grâts. Alçâsi poiantsi al braçâl de bande operade e tignint dutis dôs lis croçulis in chê altre man. Tignî slungjade indenant la gjambe operade.

11 5. ÛS DAI SERVIZIS IGJENICS Al coventarà doprât un gabinet cun sente rialçade. Lâ indaûr viers il servizi igjenic, fin a tocjâlu cul daûr dai zenoi. Cjapâ dutis lis dôs lis croçulis inte stesse man, de bande no operade, e poiâlis li dongje. 6. CEMÛT FÂ LA DOCE Si consee l'ûs di un tapêt antisbrissade e la aplicazion di une mantie tal mûr dongje dal box doce. Svicinâsi al ôr dal box doce. Sigurâsi che la temperadure de aghe no sedi ecessive. Jentrâ prime cu la gjambe no operade. Lassâ lis croçulis sot man fûr de doce. Par netâ la part inferiôr de gjambe cence pleâsi, doprâ une sponze dotade di mani. Saltâ fûr de doce prime cu la gjambe operade. 7. VASCJE DI BAGN Doprant lis croçulis, svicinâsi al ôr de vascje. Sigurâsi che la temperadure de aghe no sedi ecessive. Sentâsi sul ôr de vascje o suntune cjadree plui alte dal ôr stes e poiade plui dongje pussibil de vascje. Scjavalgjâ l'ôr de vascje prime cu la gjambe operade e po dopo cun chê sane, sentantsi plui pussibil dongje dal rubinet. Par alçâ la gjambe operade o podês judâsi cu lis mans. Par lâ fûr de vascje, passâ di là dal ôr alçant lis gjambis cun atenzion. 8. CEMÛT MONTÂ sù/ DISMONTÂ Jù DAL JET Sentâsi dongje de cocjete. Se pussibil, la gjambe operade e varès di jessi chê plui dongje dal jet. Fâ sbrissâ lis culatis indaûr, in mût che la gjambe operade e sedi la prime a lâ sù sul jet. In chest mût, si rivarà a cjatâsi distirâts su la schene. Cuant che si movisi, cirî di fâlu cun dut il cuarp, tignint lis gjambis un pôc separadis. Se no si rive a alçâ la gjambe, al è pussibil doprâ il jutori di pueste. Se pussibil, lâ jù dal jet dal flanc no operât. In chest mût la gjambe operade e restarà poiade al jet plui a dilunc, intant che si poie sul paviment il pît de gjambe sane. Fâ sbrissâ la gjambe operade jù dal jet, slungjâle devant di se e metisi in ecuilibri prime di alçâsi. No zirâsi sul flanc. Mantignî il cuarp dret. Atenzion: doprâ un jet dûr (alt plui o mancul cm). No doprâ jets bas. 9. CEMÛT DURMÎ Al è pussibil durmî suntun flanc o su la schene. Cuant che si duar suntun flanc, tignî un cussin tra lis gjambis. In chest mût si evite che il flanc al ziri bande l'interni. Si consee di no durmî sul flanc operât. Cuant che si è distirâts su la schene, meti i cussins di mût di evitâ la rotazion interne o esterne de gjambe operade.

12 10. BREGONS E BLANCJARIE INTIME Sentâsi sul jet o suntune poltrone. Cul lincin dal baston brancâ la blancjarie o i bregons pe cinture. Poiâ il baston sul paviment e metisi l'indument tacant de gjambe operade. Ripeti la operazion pe gjambe no operade. Tirâ sù i bregons fin tal zenoli, alçâsi judantsi cuntune croçule de bande no operade e meti i bregons. Par disvistîsi, sfilâ i bregons o la blancjarie prime de gjambe no operade. 11. CJALCIS E CJALÇUTS Meti la cjalce o il cjalçut sul strument di pueste (meticjalcis). Sigurâsi che il talon al sedi metût sul daûr de plastiche e che la ponte e sedi ben fissade te part terminâl. La cime de cjalce no varès di cuvierzi la ponte dal toc in plastiche. Poiâ jù il meticjalcis devant dal pît operât, tignintlu pes cuardis. Meti il pît inte cjalce e tirâle sù. Si pues meti la cjalce sul pît san intal solit mût, alçant il pît. Evitâ di sbassâsi bande il pît. Par gjavâ lis cjalcis o i cjalçuts, doprâ il baston cul lincin par cjapâ il talon e sfilâ la cjalce dal pît. 12. SCARPIS Meti scarpis cence coreis, sul gjenar mocassin, o cun coreis elastichis, par no vê di sbassâsi par laçâlis. Par meti o par gjavâ lis scarpis, doprâ il baston cul lincin o un cuar cul mani lunc. 13. IN CUSINE Doprâ grumâi cun tantis sachetis. Par traspuartâ licuits cjalts doprâ contignidôrs cul tapon. Invezit di traspuartâ i ogjets, fâju sbrissâ sul plan di lavôr. Cuant che si dopre il for, se necessari, sbassâsi pleant la gjambe no operade. Tignî la gjambe operade in maniere laterâl, cul zenoli dret. Par infornâ o disfornâ i aliments si pues doprâ ancje une cjadree. Meti la cjadree in mût che la gjambe operade e sedi de bande dal for. Sigurâsi che li dongje al sedi un carel o une taule par poiâ il contignidôr bolint. 14. JENTRÂ/JESSÎ DI UNE MACHINE Scomençâ a vuidâ dome su autorizazion dal miedi e cuant che no si varà plui bisugn dal aiût des croçulis. Svicinâsi ae sente de machine lant a cessecûl cu lis croçulis, a piçui pas. Jentrâ de bande che e permet di vê la gjambe operade plui dongje de machine. Sentâsi a planc te sente. Sbrissâ indaûr te sente. Fasint un moviment rotatori su la sente, zirâsi par denant. Se al covente, judâsi cu lis mans par alçâ lis gjambis. 15. CEMÛT CJAMINÂ Scomençâ a cjaminâ tal viert la dì dopo tornâts a cjase dal ospedâl. Scomençâ cuntune cjaminade zornaliere curte di 5-10 minûts. Cressi in maniere graduâl la durade des cjaminadis. Evitâ lis stradis ertis o dissestadis. Doprâ scarpis comudis e robustis.

13 Periodi di transizion ÛS DI CJALCIS COMPRESSIVIS Meti lis cjalcis compressivis par un mês dopo de date dal intervent. Al è pussibil gjavâ lis cjalcis dôs voltis in dì: une volte di matine, par lavâsi, e une volte di sere. No restâ cence cjalcis par plui di 30 minûts par volte. Sigurâsi che lis cjalcis a sedin cence pleis. Al è une vore impuartant metilis di gnot, cuant che si duar. Si pues molâ di meti lis cjalcis dopo un mês dal intervent. FERIDE Al è pussibil fâ la doce dome se la feride si è sierade dal dut. Se a son ancjemò vissiis o zonis no sieradis dal dut o inrossadis, cun bugnons parsore o in prossimitât de feride, no àn di jessi bagnadis. Cuant che si fâs la doce, no freolâ la feride ma suiâle cun delicatece. Se si note un fîl ae fin de feride, o conseìn di fissâlu su la piel cul cerot e di informâ il miedi, che al disarà ce fâ. ESERCIZIS Par ricjapâsi ad implen, si à di esercitâsi ogni dì. Il miedi, a sô discrezion, al podarà conseâus di cjoli une analgjesic 30 minûts prime di fâ i esercizis. Di fat, se si sint dolôr, si è mancul stimolâts a movi i muscui che a coventin a infuartî la gjambe. Al è impuartant ancje aplicâ glace sul ombul cuant che si finissin i esercizis, par ridusi il sglonfidugn.tignî la glace par minûts. Intes pagjinis seguitivis a son ripuartadis lis indicazions pai esercizis e pe deambulazion. ALIMENTAZION No son restrizions particolârs par ce che al tocje la alimentazion. Al è pussibil mangjâ in maniere normâl, tant che prime dal intervent. Si consee di mangjâ tantis pomis e verduris, e di bevi di sîs a vot tacis di aghe al dì, par ridusi il pericul di costipazion. VUIDE DAI VEICUI No si pues vuidâ la machine fin cuant che no si sarà autorizâts in chest sens dal miedi, di solit par un periodi tra lis trê e lis sîs setemanis dopo dal intervent. Il motîf de improibizion al è la sigurece personâl dal pazient che al rapresente il nestri pinsîr principâl. Di fat, par azionâ l'aceleradôr e il fren, si à di vê un bon control de gjambe. Cheste improibizion e smire a protezi la incolumitât dal pazient. No vuidâ intant che si è sot dal efiet dal analgjesic. VIAÇS Si pues lâ fûr di cjase a pene che si stime di podêlu fâ. Al è impuartant visâsi di puartâ cun se ducj i struments che a puedin servî, tant che il lincin par racuei ogjets, il cussin a aiar, lis croçulis, il baston; doprâ la toilette risiervade ai disabii. ATIVITÂT SESSUÂL Al è pussibil ricjapâ la ativitât sessuâl a pene che si sintisi in stât di fâlu. Al è plui facil rivâ a rispietâ lis precauzions pal propri ombul se si reste distirâts su la schene. VISITE DI CONTROL Al covente sometisi a une visite di control plui o mancul un mês dopo l'intervent. Tornâ a fâ il control intai mês e intai agns dopo. Indreçâsi al propri miedi par cualsisedi altre informazion in merit.

14 Esercizis di fâ a cjase dopo de operazion

15 Coret Stâ sentâts drets. Lis gjambis a àn di formâ un angul otûs a pet dal cuarp (bacin un pôc plui alt dai zenoi). Cuant che si sentisi e si alcisi, poiâsi ai braçâi de cjadree e distirâ indenant la gjambe operade. Par sbassâsi, pleâ ducj i doi i zenoi e pleâsi un pôc indenant. Puartâ i pês distribuintju in mût uniformi di dutis dôs lis bandis, o in câs doprâ un russac.

16 No Coret No sentâsi suntun plan masse bas o suntune superficie masse fofe. Cuant che si alcisi, no pleâ masse indenant il bust. No incrosâ lis gjambis. No scrofâsi, pleantsi indenant. No inclinâsi indenant tignint lis gjambis dretis. No stâ impins cu lis pontis dai pîts viers l interni.

17 Esercizis di fâ in posizion drete 1. Aduzion dal ombul Mantignî il tronc dret e poiâsi lateralmentri a alc di stabil. Tignî tirât il zenoli e sburtâ i dêts dai pîts bande l'esterni. Movi cumò in maniere laterâl la gjambe operade, e dopo ripuartâle bande la linie mediane. Ripeti _ x _ voltis in dì. 2. Flession dal ombul Alçâ il zenoli, in direzion dal adom, no plui sù de altece dal ombul e ripuartâlu in bas. Tignî il zenoli indenant e la gjambe perpendicolâr al paviment. Fâ atenzion a tignî schene e spalis dretis e a no pleâsi indenant. Ripeti_ x _ voltis in dì. 3. Estension dal ombul Poiantsi su la gjambe sane, movi indaûr chê operade, tignintle tirade, e ripuartâle indenant. No pleâ indenant il cuarp. Ripeti _ x _ voltis in dì. 4. Flession dal zenoli Poiâ il pês su la gjambe sane e movi indaûr la gjambe operade, pleant a pene il zenoli. Ripuartâle indenant fasint atenzion che il zenoli pleât nol vadi plui indenant de gjambe. Tignî dongje i zenoi. Ripeti _ x _ voltis in dì.

18 Esercizis di fâ a panze insù 1. Serie pal cuadricipit Sburtâ la part daûr dal zenoli de gjambe operade bande il bas e lis pontis dai pîts bande l'adom; in chest mût si tirin i muscui de cuesse. Mantignî tirâts il zenoli e lis pontis dai pîts par 5-10 seconts e dopo rilassâ par 5-10 seconts. Ripeti_ x _ voltis in dì. 2. Serie pai muscui posteriôrs de cuesse Tignî lis gjambis dretis, tirâ i muscui des gjambis e sburtâ la part daûr dai talons bande il bas. No pleâ il zenoli. Mantignî la posizion par 5-10 seconts, rilassâ i muscui par 5-10 seconts. Ripeti_ x _ voltis in dì. 3. Serie pes culatis Contrai lis culatis tignint lis gjambis distiradis. Mantignî la posizion par 5-10 seconts, rilassâ i muscui par 5-10 seconts. Ripeti_ x _ voltis in dì. 4. Contrazion dai muscui de pupule Contrai i muscui des pupulis slungjant lis pontis e tirant indaûr i talons, duncje slungjâ i talons e tirâ lis pontis dai pîts viers di se. Tignî i zenoi drets. Ripeti_ x _ voltis in dì. 5. Flession dal ombul Pleâ il zenoli fasint sbrissâ il talon bande il cuarp e ripuartâlu indenant. L ombul, il zenoli e il pît a àn di restâ in linie. L'esercizi al pues jessi fat di dutis dôs lis bandis. Ripeti_ x _ voltis in dì.

19 Esercizis di fâ DOME SU CONSEI dal miedi/fisioterapist POSIZION A PANZE INSÙ 1. Estension dal zenoli Meti un cussin taront sot dal ingjâf dai zenoi. Sburtâ il zenoli bande il bas e alçâ di tiere il talon de gjambe operade in mût di dreçâle. L'ingjâf dai zenoi al à di restâ aderent al cussin. Tignî la gjambe distirade par 5 seconts, sbassâ a planc il talon. Ripeti_ x _ voltis in dì. 2. Puint Tignî i zenoi e i pîts in linie cu lis spalis. Pleâ i zenoi e poiâ i pîts sul paviment. Alçâ lis culatis fin cuant che i zenoi a formin une linie drete cu lis cuessis e lis spalis. Tirâ in maniere lizere i muscui e sbassâ a planc lis culatis bande il bas, rilassâ i muscui. Ripeti_ x _ voltis in dì.

20 LA MÊ GNOVE ARTICOLAZION MODUL DI COMPILÂ PAR CURE DAL MIEDI Dì dal intervent Ombul di drete Ombul di çampe Gjambe femorâl: Cjâf femorâl: Insert: Cimentade No cimentade Ibride Notis: In câs di domandis o di problemis, clamâ il miedi curant. Non e numar di telefon dal miedi: In plui des proceduris normâls si à di visâsi che: N.B. Lis indicazions ripuartadis in chest opuscul a son di caratar gjenerâl e no scuegnin par fuarce jessi stimadis buinis par ogni singul pazient e par ogni câs specific. Par chest motîf al covente, in ogni câs, consultâsi cul miedi che al cure. Lis denominazions riferidis a personis, ripuartadis dome inte forme masculine, si riferissin in maniere indistinte a personis di gjenar masculin e feminin.